Parbhani News: ‘‘उझी माशीच्या नियंत्रणासाठी निसोलायनेक्स थायमस परोपजीवी किटकांचा वापर पर्यावरणपूरक आहे. रेशीम उत्पादक शेतकऱ्यांनी या परोपजीवी कीटकाच्या पाऊचचा (एन.टी.पाऊच) वापर करणे गरजेचे आहे,’’ अशी माहिती वसंतराव नाईक मराठवाडा कृषी विद्यापीठातील रेशीम संशोधन योजनेचे प्रभारी अधिकारी डॉ.चंद्रकांत लटपटे यांनी दिली.

मराठवाड्यात रेशीम शेतीचा विस्तार झाला आहे. सातत्याने वर्षभर कोष उत्पादन घेतले जात आहेत. रेशीम किटकांवर उझी माशीचा प्रादुर्भाव कमी-अधिक प्रमाणात होत असल्याचे आढळून येत आहे. या माशीच्या प्रादुर्भावामुळे कोषाचे साधारणतः १५ ते २० टक्क्यांपर्यंत, तर जास्त प्रादुर्भाव झाल्यास ४० ते ५० टक्क्यांपर्यंत नुकसान होऊ शकते.

उझी माशीचा जीवनक्रम १८ ते २२ दिवसांत पूर्ण होतो. प्रादुर्भावग्रस्त रेशीम किटकांच्या शरीरावर काळे डाग दिसतात. माशीच्या नियंत्रणासाठी निसोलायनेक्स थायमस (एन.टी.) या परोपजीवी कीटकांचे संगोपन करणे गरजेचे आहे. १०० अंडीपुंजासाठी या परोपजीवी कीटकाचे तीन पाऊच लावावेत.

रेशीम कीटक कोषावर गेल्यानंतर निसोलायनेक्स थायमसचे पाऊच रॅकच्या खालच्या बाजुने मध्यभागी लावावेत. असा सल्ला रेशीम संशोधन योजनेचे प्रभारी अधिकारी डॉ. चंद्रकांत लटपटे, डॉ. संजोग बोकन, धनंजय मोहोड, कीटकशास्त्र विभाग प्रमुख डॉ. पुरुषोत्तम नेहरकर यांनी दिला आहे.

वसंतराव नाईक मराठवाडा कृषी विद्यापीठातील रेशीम संशोधन योजनेमध्ये निसोलायनेक्स थायमस पाऊच (एन.टी.पाउच) उत्पादन सुरू आहे. आगाऊ रक्कम अदा करून मागणी केली तर कुरियरच्या साह्याने एन.टी.पाऊच पाठवले जातात. अधिक माहितीसाठी संपर्क (डॉ.संजोगबोकन ९९२१७५२०००).