Nanded News : बीड कृषी उत्पन्न बाजार समितीच्या रेशीम कोष खरेदी बाजारात येथील कर्मचाऱ्यांकडून मराठवाड्यातील शेतकऱ्यांचे शोषण होत आहे. खरेदीदाराला सोईचे होईल, अशी व्यवस्था येथील कर्मचारी करत असल्याची तक्रार तुती उत्पादकांनी नागपूर येथील रेशीम संचालनालयाचे उपसंचालक महेंद्र ढवळे यांच्याकडे केली आहे.
मराठवाड्यात पूर्णा (जि. परभणी), जालना नंतर रेशीम कोष विक्रीसाठी अलीकडेच बीड कृषी उत्पन्न बाजार समितीमधील रेशीम कोष खरेदी बाजार उदयास आला आहे. या ठिकाणी संपूर्ण मराठवाड्यातून शेतकरी रेशीम कोष विक्रीसाठी आणतात. बीड बाजारात होत असलेली आवक पाहून या ठिकाणी कर्नाटकसह इतर राज्यांतील व्यापारी कोष खरेदीसाठी येतात.
परंतु बीड कृषी उत्पन्न बाजार समितीच्या लिलाव पद्धतीत येथील कर्मचारी सुहास कुलकर्णी व श्री. मोरे हे हस्तक्षेप करून शेतकऱ्यांची अडवणूक करतात. या कर्मचाऱ्यांत आणि खरेदीदार व्यापाऱ्यांत संगनमत असल्याने ते शेतकऱ्यांवर दमदाटी करून कोषांचे भाव पाडतात.
याबाबत शेतकरी जाब विचारण्याचा प्रयत्न केल्यास त्यांच्यावर दबाव आणून कोष घेतला जात नाही, तसेच मारहाणीचा प्रकारही होतो, असा गंभीर आरोप शेतकऱ्यांनी उपसंचालक महेंद्र ढवळे यांच्याकडे केला.
या बाबीची दखल घेत श्री. ढवळे यांनी बीड बाजार समितीच्या सचिवांशी संपर्क करून मराठवाड्यातील कोष उत्पादनामुळे बीड बाजार समितीला उत्पन्न मिळत आहे, असे सांगत संबंधित कर्मचारी सुहास कुलकर्णी व श्री. मोरे यांच्यावर योग्य ती कार्यवाही करावी, यापुढे या ठिकाणी येणाऱ्या कोष उत्पादक शेतकऱ्यांना कोणत्याही प्रकारचा त्रास होणार नाही, शेतकऱ्यांचा कोष योग्य भावात विक्री होईल, याची काळजी घेण्याचे निर्देश दिले.
ॲग्रोवनचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.