Indapur News: इंदापूर तालुक्यातील शहाजीनगर येथील नीरा-भीमा सहकारी साखर कारखान्याच्या पंचवार्षिक निवडणुकीसाठी माजी सहकारमंत्री हर्षवर्धन पाटील यांनी दोन, तर त्यांच्या पत्नी भाग्यश्री हर्षवर्धन पाटील यांनी तीन अर्ज दाखल केले आहेत. त्यामुळे कारखान्याच्या २१ जागांच्या निवडणुकीसाठी शुक्रवारअखेर (ता. २१) पाच उमेदवारांचे दहा अर्ज दाखल झाले आहेत.

नीरा- भीमा सहकारी साखर कारखान्याच्या सन २०२४-२५ मध्ये होणाऱ्या संचालक मंडळ पंचवार्षिक निवडणुकीकरिता सोमवारपासून (ता. १७) अर्ज दाखल करण्यास सुरुवात झाली. यामध्ये पहिल्या दिवशी कारखान्याचे विद्यमान अध्यक्ष लालासाहेब देविदास पवार यांचा एकमेव अर्ज दाखल झाला आहे.

त्यानंतर दुसऱ्या दिवशी पद्मजा संदीपान कांबळे यांचा एक व संदीपान मारुती कांबळे यांचे तीन, असे एकूण चार अर्ज दाखल झाले. त्यानंतर शुक्रवारी (ता. २१) हर्षवर्धन पाटील यांनी बावडा गटातून आणि ब वर्ग प्रतिनिधीमधून असे दोन अर्ज दाखल केले आहेत, तर त्यांच्या पत्नी भाग्यश्री यांनी बावडा गटातून ब वर्ग प्रतिनिधीमधून आणि महिला वर्गातून, असे तीन अर्ज दाखल केले आहेत. त्यामुळे कारखाना निवडणुकीसाठी एकूण पाच उमेदवारांचे दहा अर्ज दाखल झाल्याची माहिती निवडणूक निर्णय अधिकारी कल्याण पांढरे यांनी दिली.

जगदाळे यांच्या भूमिकेकडे लक्ष

कारखान्याची स्थापना झाल्यापासून कारखान्यावर हर्षवर्धन पाटील यांची एकहाती सत्ता आहे. मात्र, गेल्या काही काळापासून नीरा भीमा कारखाना कार्यक्षेत्रातील मोठे राजकीय प्रस्थ असलेल्या अप्पासाहेब जगदाळे यांनी शेतकरी संघर्ष समितीच्या माध्यमातून कारखान्यावर शेतकऱ्यांशी निगडित विविध प्रश्नांवर जोरदार आंदोलन केले होते. त्यामुळे यंदाच्या निवडणुकीसाठी ते कोणती भूमिका घेणार, याकडे सर्वांचे लक्ष लागले आहे.