Buldhana News: चिखली तालुक्यातील सवणा येथे विकसित कृषी संकल्प अभियानांतर्गत नुकतेच अत्याधुनिक शेती तंत्रज्ञानाचे प्रात्यक्षिक आयोजित करण्यात आले. या उपक्रमात ड्रोनच्या सहाय्याने नॅनो युरिया फवारणीचे थेट प्रात्यक्षिक करून शेतकऱ्यांना नव्या कृषी तंत्रज्ञानाची ओळख करून देण्यात आली.

या कार्यक्रमात बुलडाणा कृषी विज्ञान केंद्रातील वरिष्ठ शास्त्रज्ञ डॉ. अमोल झापे यांच्या प्रमुख मार्गदर्शनाखाली डॉ. नरेंद्र देशमुख, डॉ. सुकेशनी वने, डॉ. भारती तिजारे, प्रवीण देशपांडे, कोकिळा भोपळे, तसेच भारतीय कृषी अनुसंधान परिषदचे शास्त्रज्ञ डॉ. बेनुकांथा दास यांनी उपस्थित शेतकऱ्यांशी थेट संवाद साधला.

चिखली तालुक्यातील वळती, सवणा, चांदई, धोडप तसेच बुलडाणा तालुक्यातील बिरसिंगपूर, देऊळघाट, उमाळा, गिरडा, मढ आदी गावांमध्ये विकसित कृषी संकल्प अभियान राबवण्यात आले. या अभियानात वैज्ञानिकांचे पथक दररोज आठ ते दहा गावांत रथयात्रेद्वारे पोहोचत असून शेती व विज्ञान यामधील दरी कमी करणे, तसेच शेतीत वैज्ञानिक दृष्टिकोन रुजवणे हा या उपक्रमाचा मुख्य उद्देश आहे.

या उपक्रमाच्या यशस्वी आयोजनात इफको संस्थेचे सहकार्य लाभले असून प्रक्षेत्र अधिकारी कल्याण अटकळे, मार्केटिंग अधिकारी शंतनू चवंड व योगेश पाटील यांनी समन्वयाची भूमिका पार पाडली. कार्यक्रमाच्या यशस्वीतेसाठी सवणा येथील प्रगतशील शेतकरी विजय भुतेकर यांनी पुढाकार घेतला.