Kolhapur News : रत्नागिरी-नागपूर महामार्गाअंतर्गत उदगाव ते चोकाक दरम्यानच्या जमिनी मोजणीकरिता आल्यास अधिकाऱ्यांचे पाय मोडण्याचा इशारा दिल्यानंतर सोमवारी (ता. १७) शेतकऱ्यांना नोटिसा देऊनही अधिकाऱ्यांनी मात्र मोजणीकडे पाठ फिरवली. दहा गावांतील शेतकरी मोजणी करणाऱ्या अधिकाऱ्यांची प्रतीक्षा करत होते. मात्र दुपारपर्यंत अधिकारीच फिरकले नसल्याने शेतकऱ्यांनी त्यांचा निषेध करून अधिकाऱ्यांना यापुढेही मोजणीसाठी शेतात पाय ठेवू देणार नसल्याचा निर्धार शेतकऱ्यांनी केला.

स्वाभिमानी शेतकरी संघटनेचे अध्यक्ष राजू शेट्टी यांनी मुख्यमंत्र्यांसमवेत बैठक झाल्याशिवाय अधिकाऱ्यांना फिरकू देणार नसल्याचा इशारा दिला आहे. उमळवाड व मंगळवारी उदगाव येथील बांधित शेतीची मोजणी करणार असल्याच्या नोटिसा शेतकऱ्यांना आल्या होत्या. त्यानुसार सोमवारी साडेनऊ वाजता मोजणी अधिकारी व कर्मचारी येणार होते. मात्र शेतकऱ्यांचा विरोध पाहून या मोजणीला कर्मचारी आलेच नाहीत.

चोकाक ते उदगांवपर्यंतच्या शेतकऱ्यांच्या पाठीशी मी ठामपणे उभा आहे. याबाबत माझी मुख्यमंत्री यांच्यासमवेत चर्चा झाली आहे. लवकरच चौपट भरपाई व इतर मागण्यासाठी मुख्यमंत्री देवेंद्र फडवणीस यांच्यासमवेत बैठक घेणार आहे. तोपर्यंत मोजणीला स्थगिती दिली आहे. शेतकऱ्यांच्या प्रश्नावर मी गंभीर असून यात कोणी राजकारण कारायचे काम नाही.

शिवाय अनेक जण वेगवेगळ्या अफवा पसरवत आहेत. शेतकऱ्यांनी या अफवांवर विश्वासू ठेवू नये. त्यामुळे चौपट भरपाई व अन्य मागण्यांसाठी तोडगा काढल्याशिवाय गप्प बसणार नसल्याचे आमदार राजेंद्र पाटील यड्रावकर यांनी उमळवाडच्या शेतकऱ्यांना सांगितले.

या वेळी विद्याधर कर्वे, सुदर्शन मगदुम, अनुपम मगदुम, चेतन खोंद्रे, वृषभ पाटील, डॉ. सुहास मगदुम, राजगोंडा मगदुम, सुनील कामाण्णा, दानलिंग दणाणे, वैभव भवरे, सचिन मगदुम, बाळू दांड, सचिन नकाते यांच्यासह शेतकरी मोठ्या संख्येने उपस्थित होते.