Jalgaon News : खानदेशात बाजरीची पेरणी सुरू झाली असून, यंदा क्षेत्र साडेसहा हजार हेक्टरवर स्थिर राहील, असे संकेत आहेत. बाजरीची सर्वाधिक पेरणी धुळे जिल्ह्यात होईल, असाही अंदाज आहे.

कमी कालावधी व कमी पाण्याचे पीक म्हणून बाजरीची ओळख आहे. मागील वर्षभरापासून बाजरीचे दरही टिकून आहेत. मागील सात ते आठ महिन्यांत बाजरीला सरासरी २१०० रुपये प्रति क्विंटलचा दर मिळाला आहे. खानदेशातील नंदुरबार, धुळ्यातील धुळे, दोंडाईचा (ता. शिंदखेडा),

शिरपूर, जळगावमधील चाळीसगाव, पाचोरा, चोपडा, अमळनेर या बाजार समित्यांत बाजरीला उठाव राहीला आहे. खरिपातही बाजरीची पेरणी बऱ्यापैकी झाली होती. ही पेरणी सुमारे १३ हजार हेक्टरवर झाली होती. धुळ्यातील शिंदखेडा तालुका बाजरीच्या उत्पादनात आघाडीवर आहे.

रब्बीत कमी पाऊसमान झाल्याने पेरणी घटेल, असा अंदाज होता. परंतु अनेक शेतकऱ्यांनी कांदा व इतर भाजीपाला पिकांची लागवड कमी करून किंवा लागवड टाळून बाजरी पेरणीचे नियोजन केले आहे. यात आगाप पेरणीला सुरुवात झाली असून, ही पेरणी धुळ्यातील शिरपूर, जळगावातील चोपडा,यावल, चाळीसगाव भागांत अनेक शेतकऱ्यांनी केली आहे.

यंदा चाऱ्याची टंचाई असणार आहे. तसेच तृणधान्यासही उठाव आहे. यामुळे बाजरीतून नफा मिळेल व चाराही उपलब्ध होईल, अशी शेतकऱ्यांना अपेक्षा आहे. पेरणी अनेर, पांझरा, तापी, गिरणा आदी नद्यांच्या लाभक्षेत्रात दरवर्षी केली जाते. यंदा धुळ्यातील साक्री, धुळे, जळगावातील पारोळा, अमळनेर, बोदवड या भागात पेरणी वाढणार नाही. मागील हंगामात सर्वत्र पेरणी बऱ्यापैकी किंवा अपेक्षेएवढी झाली होती.

पेरणी पुढे जानेवारीच्या अखेरपर्यंत सुरू राहणार आहे. पेरणीसाठी शेतकरी कमी कालावधीत येणाऱ्या वाणाची निवड करीत आहेत. तसेच काही शेतकरी बारीक दाणे व चमकदारपणा असणाऱ्या बाजरीची पेरणी करीत आहेत.

काढणी पूर्ण झालेल्या केळी बागांतही पेरणी

खानदेशात कांदेबाग केळीतील काढणी ९५ ते ९७ टक्के पूर्ण झाली आहे. या बागांमध्ये किरकोळ आंतरमशागत करून केळी बागेसाठी टाकलेल्या ठिबकचा उपयोग बाजरीच्या सिंचनासाठी केला जात आहे. केळीच्या बेवडमध्ये बाजरी जोमात येते, असे खानदेशातील केळी उत्पादक मानतात.

तसेच बाजरीचे बेवड जमीन सुपीकतेसाठी उपयुक्त असते. यामुळे काढणी पूर्ण झालेल्या केळी बागांमध्ये बाजरीची पेरणी सुरू आहे. ही पेरणी जळगाव, जामनेर, चोपडा, धुळ्यातील शिरपूर भागात अनेक शेतकऱ्यांनी केल्याची माहिती मिळाली.