Nagar News : शेतकरी संघटना व दूध उत्पादक शेतकरी यांनी जिल्ह्यात केलेल्या आंदोलनामुळे शासनाने तीस रुपये दर देण्याचे जाहीर केले. मात्र जिल्ह्यातील काही दूधसंघाने तीस रुपये दर देण्याची असमर्थता दर्शवली आहे. त्यामुळे शेतकरी संघटनेच्या पदाधिकाऱ्यांनी जिल्हा दुग्धविकास अधिकाऱ्यांकडे तक्रार केली आहे.

शेतकरी संघटनेचे अध्यक्ष अनिल औताडे, श्रीरामपूर तालुका अध्यक्ष युवराज जगताप, पशुवैद्यकीय शेतकरी संघटनेचे जिल्हाध्यक्ष डॉ. दादासाहेब आदिक, साहेबराव चोरमल, प्रभाकर कांबळे यांच्यासह पदाधिकाऱ्यांनी दिलेल्या निवेदनात म्हटले आहे, की दुधाला दर मिळावा यासाठी गेल्या काही दिवसांपासून आंदोलने सुरू आहेत.

शेतकरी संघटनेने यासाठी आंदोलन केले. शासनाने पाच जुलैला काढलेल्या अध्यादेशानुसार ३.५ फॅट व ८.५ एसएनएफ असलेल्या गुणप्रतीच्या दुधाला तीस रुपये प्रति लिटर दर देण्याचा निर्णय घेतला आहे. तसेच पाच रुपये प्रति लिटर अनुदान देणार आहेत. त्याचप्रमाणे फॅटसाठी वाढलेल्या प्रत्येक पॉइंटला ३० पैसे वाढ व घटलेल्या प्रत्येक पॉइंटला ३० पैसे कमी करण्याबाबत सूचित केले आहे.

सर्व खासगी व सहकारी दूध संघांनी १ जुलै २०२४ पासून अंमलबजावणी होणार आहे. परंतु श्रीरामपूर येथील सनफ्रेश ॲग्रो लिमिटेडने जुन्याच दराने म्हणजे २७ रुपये प्रती लिटरने शेतकऱ्यांना पैसे दिल्याचा प्रकार गुरुवारी उघड झालेला आहे. या संघाने ११ जानेवारी २०२४ ते १० मार्च २०२४ साठी संकलन केलेल्या दुधाला शासनाने प्रति लिटर पाच रुपये अनुदान जाहीर केले होते.

सदर अनुदानाबाबत केंद्र चालकांनी व काही दूध शीतकरण केंद्र चालकांनी अनुदानासाठी सर्व माहिती ई-मेलद्वारे अपलोड करूनही सनफ्रेश ॲग्रो लिमिटेडने जिल्हा दुग्धविकास अधिकाऱ्याकडे माहिती दिली नसल्याने पात्र शेतकऱ्यांना अनुदानापासून वंचित राहण्याची वेळ आल्याचा संघटनेचा आरोप आहे.

सदर अनुदान मिळण्यासाठी संबंधित अधिकारी यंत्रणा यांना जबाबदार धरून त्यांच्याकडे व्यक्तिगत स्वरूपात कारवाया करून वसूल करावी अथवा दुग्ध विकास विभागाने माहिती अपलोड करण्यासाठी मुदत वाढवावी असेही तक्रारीत संघटनेने म्हटले आहे.