Pune News: राज्यातील जलसंपदा विभागाच्या सर्व कार्यालयांमध्ये सिंचन नियोजनाचा अभ्यास करण्यासाठी ‘आंतरवासिता’ (इंटर्नशिप) करण्यास आता मान्यता देण्यात आली आहे. विद्यार्थ्यांना राज्यातील जलसंपदा विभागाचे सर्व प्रकल्प, उपसा जलसिंचन योजना, जलनियोजन, जलहवामान, पर्जन्य, सिंचन व्यवस्थापन, प्रकल्प आरेखन याची माहिती व्हावी व तेथे अनुभव मिळावा यासाठी इंटर्नशिपला मान्यता द्यावी, असा प्रस्ताव उच्च व तंत्र शिक्षण विभागाने पाठवला होता.

जलसंपदा विभागाने या प्रस्तावाला मान्यता दिली आहे. अर्थात, हा प्रस्ताव मंजूर करताना काही अटीदेखील टाकण्यात आल्या आहेत. राज्यातील मान्यताप्राप्त अभियांत्रिकी महाविद्यालयात पदवी अभ्यासक्रमाच्या केवळ (बीई किंवा बी-टेक) तिसऱ्या किंवा चौथ्या वर्षातील विद्यार्थी या सवलतीस पात्र असतील. तसेच, मान्यताप्राप्त विद्यापीठात अभियांत्रिकीच्या पदव्युत्तर पदवी (एमई किंवा एमटेक) च्या पहिल्या व दुसऱ्या वर्षातील विद्यार्थीही ‘इंटर्नशिप’ करू शकणार आहेत.

जलसंपदा विभागाच्या या महत्त्वपूर्ण निर्णयामुळे अभियांत्रिकीच्या विद्यार्थ्यांना आता ‘मेरी’ अर्थात महाराष्ट्र अभियांत्रिकी संशोधन संस्थेसह मध्यवर्ती संकल्पचित्र संघटना (सीडीओ) तसेच जलविज्ञान व धरण सुरक्षितता संघटना (डीएसओ) या प्रख्यात तीन संस्थांची दारे खुली झाली आहेत. राज्याच्या सिंचन नियोजनात मोलाची भूमिका बजावणाऱ्या या संस्थांमधील कामकाजाचा प्रत्यक्ष अभ्यास करण्याची संधी आता मिळते आहे.

गोपनीय माहिती उघड केल्यास कारवाई

धरण सुरक्षितता तसेच जलसंपदा विभागातील विशिष्ट कामकाज गोपनीय स्वरूपाचे असल्यामुळे विद्यार्थ्यांनाही गोपनीयता पाळावी लागणार आहे. जलसंपदा विभागाशी संबंधित कोणतीही गोपनीय माहिती उघड केल्यास विद्यार्थ्यांसह शिक्षण संस्थेवरदेखील कारवाई केली जाईल, अशी कठोर अट या उपक्रमात टाकण्यात आली आहे, असे जलसंपदा विभागाच्या सूत्रांनी सांगितले.

माध्यमांशी संवाद साधण्यास मनाई

जलसंपदा विभागाशी संबंधित कोणत्याही संस्थेत इंटर्नशिप करणाऱ्या विद्यार्थ्यास माध्यमाशी संपर्क करण्यास मनाई घालण्यात आली आहे. तसेच, मान्यता न घेता जलसंपदा विभागातर्फे संबंधित विद्यार्थी कोणत्याही त्रयस्थ पक्षाशी संवाद साधणार नाही किंवा माहिती देऊ शकणार नाहीत, असेही सूत्रांचे म्हणणे आहे.