Nanded News : जिल्ह्यात सलग सात दिवसांपासून पावसाने जोरदार हजेरी लावली. हा पाऊस जिल्ह्याच्या सर्वच भागांत कमी-अधिक होत आहे. यामुळे काढणीला आलेल्या सोयाबीन पिकाचे नुकसान होत आहे. बुधवारी (ता. २५) जिल्ह्यात चांडोळा व मुदखेड मंडलात अतिवृष्टीची नोंद झाली आहे. मागील चोवीस तासांत सरासरी १३.१० मिलिमिटर पावसाची नोंद झाली.

जिल्ह्यात भारतीय हवामान खात्याने अतिवृष्टीचा इशारा दिला आहे. यानुसार जिल्ह्यात २० तारखेपासून पावसाला सुरुवात झाली. शुक्रवारी झालेल्या पावसानंतर जिल्ह्यात रविवारी पावसाचा जोर वाढला. शुक्रवारी (ता. २०) दुपारी दोनच्या सुमारास जिल्ह्याच्या अनेक भागांत पावसाने हजेरी लावली. हा पाऊस धर्माबाद, अर्धापूर, लोहा, हदगाव, नांदेड व मुदखेड तालुक्यात झाला होता.

पावसाने प्रमाण अधिक असल्याने धर्माबाद तालुक्यातील सिरजखेड मंडलात ७४.५० मिलिमीटर पावसाची नोंद झाली होती. यानंतर दुसऱ्या दिवशी पावसाने पुन्हा झोडपून काढले. सततच्या पावसाने काढणीला आलेल्या सोयाबीनचे नुकसान होत आहे. जिल्ह्यात आजपर्यंत पाच लाख हेक्टरवरील पिकांचे नुकसान झाले आहे.

सततच्या पावसामुळे यात अधिक वाढ होण्याची भीती व्यक्त होत आहे. दरम्यान बुधवारचा पाऊस मुखेड तालुक्यातील चांडोळा मंडलात ८४.८० मिलिमीटर तर मुदखेड मंडलात ७१ मिलिमीटर पाऊस झाल्यामुळे या ठिकाणी अतिवृष्टीची नोंद झाली. मागील चोवीस तासात जिल्ह्यात सरासरी १३.१० मिलीमीटर पाऊस झाला. जिल्ह्यात आजपर्यंत ८६५.२० मिलीमीटरनुसार वार्षिक सरासरीच्या ९७.१३ टक्के पावसाची नोंद झाली आहे.

मंडलनिहाय झालेला पाऊस

रामतीर्थ मंडलात ४८ मिलिमीटर, जाहूर २४, आंबुलगा ३७.८, पेठवडज २२.५, बारुळ २२.५, तामसा २६.५, आष्टी २६.५, भोकर २९, इस्लापूर ५७.५, दहेली ६३.५, जलधारा २४, सिंदगी २७.३, उमरी बाजार ३९.३०, मुगट २३.८, बारड २७.५, हिमायतनगर ३६.८, जवळगाव ३६.८, सिंदखेड ३६.