Solapur News : सोलापुर जिल्ह्यात पशुधनाची टॅगिंग मोहीम युद्धपातळीवर सुरु असून जूनपासून जनावरांना शासकीय पशुवैद्यकीय दवाखान्यात मोफत उपचार व नैसर्गिक आपत्तीत भरपाई मिळण्यासाठी इअर टॅगिंगची (कानावर नोंदणी बिल्ला) सक्ती असणार आहे.

शासनाने जनावरांची माहिती योग्य पद्धतीने उपलब्ध व्हावी. तसेच प्रत्येक जनावरांची नोंद होऊन पशुपालकांना उत्तम सेवा मिळावी यासाठी टॅगिंग मोहिमेचा आग्रह धरला आहे. त्यासाठी जनावरांचे टॅगिंगचे काम केले जात आहे. मागील काही महिन्यापासून टॅगिंगचे काम सुरु आहे.

मात्र जूनपासून फक्त टॅगिंग केलेल्या जनावरांनाच उपचार व पशुपालकांस भरपाईचा लाभ मिळवता येणार आहे. त्यामुळे पशुपालकांसाठी टॅगिंग करणे बंधनकारक बनले आहे. अाता पशुपालकांनी पूर्वीपासून बाळगलेली जनावरे, नव्याने जन्मलेले पशुधन व खरेदी केलेल्या जनावरांची टॅगिंग करावी.

केंद्राच्या नॅशनल लाईव्हस्टॉक डिजिटल मिशनच्या अंतर्गत ही मोहीम हाती घेण्यात आली आहे. टॅगिंगमध्ये प्रत्येक जनावरास १२ अंकी क्रमांक दिला जातो. या क्रमांकानुसार जनावरांचे टॅगिंग केले जाते. सर्वच जनावरांसाठी ही योजना असली तरी गाई व म्हशीच्या संदर्भात महत्त्वाची ठरणार आहे. या टॅगिंगमुळे जनावरांची जात, वंश, वय, मुळ स्थान, वेत आदी माहिती नोंदवली जाणार आहे. एकदा ही माहिती नोंदविल्यानंतर जनावरांच्या बाबतीत कधीही माहितीच्या आधारे सर्व प्रकारची मदत पशुपालकांना मिळवता येणार आहे.

जिल्हयात १२ लाख ४१ हजार जनावरांची संख्या

यापूर्वी जिल्ह्यात टॅगिंगचे काम काही प्रमाणात पूर्ण

३१ मे पर्यंत

टॅगिंग करणे गरजेचे

जूनपासून शासकीय पशुवैद्यकीय दवाखान्यातील टॅग नसलेल्या जनावरांना उपचार सेवा मिळणे होणार बंद

नैसर्गिक आपत्तीतील भरपाई टॅग असलेल्या जनावरांसाठी मिळणार