Sangli News : ‘ॲग्रोवन ॲग्री एक्स्पो’ हे प्रदर्शन १८ ते २१ ऑक्टोबर २०२४ रोजी मिरजेतील अंबाबाई तालीम संस्थेच्या संजय भोकरे ग्रुप ऑफ इन्स्टिट्यूटच्या मैदानावर झाले होते. या चारदिवसीय प्रदर्शनात हजारो शेतकऱ्यांनी भेट देऊन शेतीतील नवतंत्रज्ञानाची माहिती घेतली होती.

भेट देणाऱ्या प्रत्येक शेतकऱ्यांकडून एक प्रवेशिका भरून घेण्यात आली होती. ‘किसान ड्रोन डॉट कॉम’ या कंपनीने भेट देणाऱ्या भाग्यवान शेतकऱ्याला अत्याधुनिक तंत्रज्ञानयुक्त व शेतशिवाराच्या फवारणीसाठी ड्रोन देण्याची घोषणा केली होती.

हजारो प्रवेशिकांतून काढण्यात आलेल्या सोडतीतून भाग्यवान विजेत्यांची निवड करण्यात आली. केंद्रीय जीएसटीचे वरिष्ठ निरीक्षक राजेंद्र मेढेकर, महापालिकेचे उपायुक्त रविकांत आडसूळ यांच्याहस्ते भाग्यवान विजेत्यांची प्रवेशिका सोडतीद्वारे काढण्यात आली.

कोल्हापूर जिल्ह्यातील तुडीये (ता. चंदगड) येथील सतीश पाटील या युवक शेतकऱ्याला सोडतीतून ड्रोनचे बक्षीस लागले होते. त्यानुसार ‘किसान ड्रोन डॉट कॉम’तर्फे ड्रोन देण्यात आला.

त्याचे वितरण केंद्रीय जीएसटीचे वरिष्ठ निरीक्षक राजेंद्र मेढेकर यांच्याहस्ते ‘सकाळ’च्या सांगली कार्यालयात नुकतेच झाले. ‘किसान ड्रोन डॉट कॉम’ कंपनीचे सौरभ घेवारी, कंपनीच्या आधारस्तंभ श्रद्धा घेवारी, तुंग (ता. मिरज) येथील प्रगतिशील शेतकरी ॲड. वासुदेव कुलकर्णी, ‘ॲग्रोवन’चे वरिष्ठ व्यवस्थापक ज्ञानदेव मासाळ, तुडिये येथील शेतकरी नवनाथ वाणी आदी उपस्थित होते.