Agriculture Drone : सोलापूर जिल्ह्यात प्रथमच ड्रोनद्वारे शेतीकामे

Solapur News : उमेद अभियानांतर्गत सोलापूर जिल्ह्यातील सात तालुक्यांतील प्रत्येकी एका ग्राम संघाला ड्रोनचे वाटप करण्यात आले. त्या संघांच्या ड्रोन दीदी व सहायक अशा १४ जणींचे प्रशिक्षण पूर्ण झाले आहे. त्यामुळे जिल्ह्यात शेती फवारणीची कामे ड्रोनद्वारे सुरू होणार आहेत.

उमेद अभियानांतर्गत महिला ग्राम संघांना ड्रोनचे वाटप केल्याने आता ड्रोन शेती संकल्पना रुजण्यास मदत होणार आहे. आता ग्राम संघांच्या ड्रोन दीदी व सहायकांचे प्रशिक्षण पूर्ण होऊन त्यांना पायलट म्हणून परवानाही देण्यात आला आहे.

त्यामुळे त्यांना आता शेती फवारणीची कामे मिळण्यास प्रारंभ होणार आहे. त्यानंतर पारंपरिक पद्धतीपेक्षा अधिक कार्यक्षम आणि अचूक अशा या पर्यायाला प्रतिसाद मिळण्याची शक्यता आहे. शेतीत ड्रोनच्या मदतीने फवारणी, सर्वेक्षण आणि इतर कामे करता येतात.

या पद्धतीत अचूकता आणि सर्वत्र समान प्रमाणात फवारणीमुळे उत्पादनाचा दर्जाही सारखा राहतो व खर्चातही बचत होते.

ड्रोन वापराचे फायदे

पिकांवरील कीड-रोग ओळखता येतात.

कमी वेळेत जास्त क्षेत्रावर फवारणी करता येते.

औषधे, खते आणि पाण्याची बचत होते.

शेतकऱ्यांना कमी खर्चात जास्त उत्पादन घेता येते.

ड्रोन शेतीसाठी सूचना

प्रशिक्षित पायलटकडूनच ड्रोन चालवावा. पिकांत झाडे, खांब पाहून फवारणी करावी.

पीक प्रकारानुसार औषधाचे प्रमाण ठरवावे. शेती क्षेत्रानुसार ड्रोन खरेदी करा.

ड्रोन चालवणे व दुरुस्तीचे प्रशिक्षण घ्या.