Nashik News : : राज्यात पिकांची उत्पादकता वाढविण्यासाठी विविध भागामध्ये शेतकऱ्यांकडून शेतीत विविध प्रयोग करण्यात येतात. अशा प्रयोगशील शेतकऱ्यांना प्रोत्साहन देण्यासाठी खरीप पीक स्पर्धा २०२५–२६ चे आयोजन करण्यात येत आहे.

या पीक स्पर्धेत सहभागी होण्यासाठी  शेतकऱ्यांनी ३१ जुलैपर्यंत अर्ज सादर करावेत, असे आवाहन जिल्हा अधीक्षक कृषी अधिकारी अभिमन्यू काशीद यांनी केले आहे. पीक स्पर्धेतील खरीप पिके भात, ज्वारी, बाजरी, मका, नाचणी (रागी), तूर, मूग, उडीद, सोयाबीन, भुईमूग व सूर्यफूल अशी एकूण ११ पिके आहेत.

स्पर्धेत भाग घेण्यासाठी शेतकऱ्याकडे स्वतःच्या नावे जमीन असणे आवश्यक आहे. पीक स्पर्धेमध्ये सहभागी लाभार्थींच्या स्वतःच्या शेतावर त्या पिकाखाली किमान ४० आर क्षेत्रावर सलग लागवड असणे आवश्यक आहे.

सर्वसाधारण गटासाठी रुपये ३०० तर आदिवासी गटासाठी १५० रुपये शुल्क आहे. यातून तालुका, जिल्हा व राज्य स्तरावर प्रथम, द्वितीय व तृतीय क्रमांकाचे पीक स्पर्धा विजेते काढण्यात येणार आहेत.

विहित नमुन्यातील अर्ज , ठरवून दिलेले प्रवेश शुल्क भरल्याचे चलन, ७/१२, ८-अ चा उतारा, जात प्रमाणपत्र (केवळ आदिवासी असल्यास), पीक स्पर्धेसाठी शेतकऱ्याने संबंधित ७/१२ वरील घोषित केलेल्या क्षेत्राचा चिन्हांकित केलेला नकाशा, बँक खाते चेक/पासबुकच्या पहिल्या पानाची छायांकित प्रत जोडावी.

 मूग व उडीद पिकासाठी अंतिम तारीख ३१ जुलै,तर भात,ज्वारी, बाजरी, मका,नाचणी(रागी),तूर, सोयाबीन, भुईमूग व सूर्यफूल पिकासाठी अंतिम मुदत ३१ ऑगस्ट आहे. पीक स्पर्धेत सहभागी होण्यासाठी संबंधित सहाय्यक कृषी अधिकारी व तालुका कृषी अधिकारी कार्यालयाशी संपर्क साधावा,असेही प्रसिद्धी पत्रकात नमूद केले आहे.

पीकस्पर्धा बक्षीसाचे स्वरूप(रक्कम रुपये)

स्तर प्रथम द्वितीय तृतीय

तालुका ५,००० ३,००० २,०००

जिल्हा १०,००० ७,००० ५,०००

राज्य ५०,००० ४०,००० ३०,०००