Nanded News : जिल्ह्यात प्रधानमंत्री पीक विमा योजनेतर्गत खरीप हंगाम २०२४ मध्ये अतिवृष्टीमुळे पिकांचे मोठ्या प्रमाणात नुकसान झाले होते. यामुळे विमाधारक शेतकऱ्यांनी भरपाई मिळावी, यासाठी स्थानिक नैसर्गिक आपत्ती, विस्तृत स्थानिक नैसर्गिक आपत्ती, काढणी पश्‍चात नुकसान या घटकांतर्गत दावे दाखल केले होते. परंतु विमा कंपनीकडून मात्र या नुकसानग्रस्तांना किती परतावा मिळणार याबाबत माहिती मिळत नसल्यामुळे शेतकऱ्यांत संभ्रम निर्माण झाला आहे.

नांदेड जिल्ह्यात जिल्ह्यात ऑगस्ट तसेच सप्टेंबरमध्ये जोरदार झाला. पाऊस जिल्ह्याच्या सर्वच भागात झाल्यामुळे खरिपातील पिकांचे मोठ्या प्रमाणात नुकसान झाले. पावसाचे प्रमाण अधिक असल्याने जिल्ह्यातील अनेक मंडळात एकापेक्षा अधीकवेळा अतिवृष्टी नोंदली गेली. जोरदार झालेल्या पावसामुळे नदी-नाल्यांना पूर आला. यात नदीकाठची पिके खरडून गेली. तर काही ठिकाणी पाणी साचून पिकाचे नुकसान झाले होते.

अतिवृष्टीत जिल्ह्यातील सात लाखांपेक्षा अधिक शेतकऱ्यांच्या पिकांचे नुकसान झाल्याची माहिती प्रशासनाने शासनाकडे पाठविली होती. याबाबत शेतकऱ्यांना हंगामातील प्रतिकूल परिस्थिती घटकातर्गत २५८ कोटींची भरपाई मंजूर झाल्याने ती वाटपाचे काम सुरू आहे. दरम्यान, शेतकऱ्यांनी यानंतरही झालेल्या अतिवृष्टीमुळे पिकांचे नुकसान झाल्याने विमा कंपनीकडे भरपाई मिळावी या संदर्भात दावे दाखल केले होते.

यात स्थानिक नैसर्गिक आपत्ती, विस्तृत स्थानिक नैसर्गिक आपत्ती, काढणी पश्‍चात नुकसान तसेच पिककापणी प्रयोगाच्या आधारावर नुकसान या घटकातर्गत परताव्यासाठी शेतकऱ्यांनी दावे दाखल केले आहेत.

या घटकातर्गत शेतकऱ्यांना विमा परतावा मंजूर असल्याचे सांगीतले जात असलेतरी विमा कंपनीकडून मात्र याबाबत अधिकची माहिती देण्यात आली आहे. या संदर्भात जिल्हाधिकारी राहुल कर्डिले यांच्याशी संपर्क केला असता त्यांनी जिल्हा अधीक्षक कृषी अधिकारी दत्तकुमार कळसाईत यांना याबाबत माहिती देण्यासाठी सूचित केल्याचे म्हणाले.