Buldana News : सिंदखेडराजा मतदार संघात खडकपूर्णा धरण आहे. मात्र, त्याचा फायदा सिंदखेडराजा तालुक्याला नाही. दुर्दैवाने लोकप्रतिनिधींनी सुद्धा शेतकऱ्याच्या हितासाठी आजवर लक्ष दिले नाही. त्यामुळे ‘धरण उशाला आणि कोरड घशाला’, असा हा प्रकार असून संपूर्ण सिंदखेडराजा तालुक्याला पाणी मिळण्यासाठी आता पाण्याचे पुनर्वाटप करा, अशी मागणी आमदार सिद्धार्थ खरात यांनी केली आहे.

खडकपूर्णा धरणातून वाया जाणारे पाणी मिळावे, यासाठी शिवणी आरमाळ येथील प्रयोगशील शेतकरी कैलास नागरे यांनी बलिदान दिले. त्यामुळे आमदार मनोज कायंदे यांनी पालकमंत्र्यांकडे हा प्रश्‍न लावून धरीत १४ गावांचा खडकपूर्णा प्रकल्पामध्ये समावेश केला.

यामुळे देऊळगावराजा तालुक्यातील आणि थोडेफार सिंदखेडराजा तालुक्यातील गावांना पाणी मिळण्याचा प्रश्‍न मार्गी लागणार आहे. मात्र, डोरव्ही, मलकापूर पांगरा, शेंदुर्जन यासह या परिसरातील गावे पाणी मिळण्यापासून वंचित राहणार आहेत.

त्यामुळे नाराज झालेल्या गावकऱ्यांनी आमदार खरात यांच्याशी संवाद साधून त्यांच्या भागात देखील कालव्याद्वारे पाणी देण्यात यावे, अशी मागणी केली. याची दखल घेत आमदार खरात यांनी हा प्रश्‍न आपण सभागृहात आणि पालकमंत्र्यांकडे लावून धरणार आहोत, असे आश्वासन दिले.

आता बाहेरच्या जिल्ह्यासाठी खडकपूर्णा धरणाचे पाणी आरक्षित करण्यात येणार आहे, या बाबत प्रश्‍न उपस्थित करीत त्यांनी पहिल्यांदा आमच्या तालुक्यातील पाण्याचे नियोजन करा, तालुक्यातील वंचित गावांना पाणी द्या, अशी आग्रही मागणी केली आहे.

सिंदखेडराजा तालुक्यात जे कालवे तयार केले, त्यामधून एक थेंब सुद्धा पाणी आलेले नाही. मग ते कालवे कशासाठी खोदले, सदर पैसे कोणाच्या घशात गेले? असा संतप्त सवाल देखील या वेळी आमदार खरात यांनी उपस्थित केला. या वेळी माजी सभापती नाथा दराडे, सरपंच यादव टाले, अर्थतज्ज्ञ डॉ. नरेश बोडखे, प्रवीण गीते, फिरोज पैलवान, इरफान शेख, कैलास साळवे, देवा चरवे उपस्थित होते.