New Delhi News: सर्वोच्च न्यायालयाचे ५२ वे सरन्यायाधीश म्हणून न्या. भूषण गवई यांनी बुधवारी (ता. १४) पद आणि गोपनीयतेची शपथ घेतली. राष्ट्रपती भवनात झालेल्या शानदार कार्यक्रमात राष्ट्रपती द्रौपदी मुर्मू यांनी गवई यांना शपथ दिली. न्या. गवई यांना सरन्यायाधीश म्हणून काम करण्यासाठी सहा महिन्यांचा कार्यकाळ मिळणार आहे.

शपथविधीच्या कार्यक्रमास उपराष्ट्रपती जगदीप धनखड, पंतप्रधान नरेंद्र मोदी, माजी राष्ट्रपती रामनाथ कोविंद, मावळते सरन्यायाधीश संजीव खन्ना तसेच गवई कुटुंबयांसह विविध क्षेत्रांतील मान्यवर उपस्थित होते.

कायदा मंत्रालयाने गत महिन्याच्या अखेरीस गवई यांची सरन्यायाधीशपदी नियुक्ती केली जात असल्याचे सांगत अधिसूचना काढली होती. न्या. गवई यांनी हिंदी भाषेतून शपथ घेतली. गवई हे अनुसूचित जाती समाजाचे दुसरे तर बौद्ध समाजाचे प्रतिनिधित्व करणारे देशाचे पहिले सरन्यायाधीश ठरले आहेत. मे २०१९ मध्ये गवई यांची सर्वोच्च न्यायालयात न्यायमूर्ती म्हणून पदोन्नती करण्यातआली होती. तत्पूर्वी ते मुंबई उच्च न्यायालयात कार्यरत होते.

न्या. गवई यांनी शपथ घेण्यापूर्वी पहिल्या रांगेत बसलेल्या सर्व मान्यवरांना अभिवादन केले. त्यानंतर त्यांनी मातोश्री कमलताई यांच्याकडून पदस्पर्श करीत आशीर्वाद घेतला. या वेळी कमलताई यांनीही मान झुकूवत गवई यांना प्रणाम केला.

यानंतर सभागृहात टाळ्यांचा कडकडाट झाला. कठोर मेहनत आणि दृढ संकल्प हे भूषण गवई यांच्या यशाचे रहस्य असल्याचे कमलताई यांनी नंतर पत्रकारांशी बोलताना सांगितले. गरीब आणि गरजू लोकांना मदत करण्याचा आपल्या मुलाचा स्वभाव असल्याचे सांगतानाच नव्या पदाला ते न्याय देतील, असा विश्वास कमलताई यांनी व्यक्त केला.