Jalgaon News: खानदेशात अनेक सिंचन प्रकल्प फक्त चर्चेत आहेत. त्यांचे काम पूर्ण होत नाही. लोकप्रतिनिधी त्यांच्या कामांच्या सुधारित प्रशासकीय मान्यता मिळविण्याचा सपाटा लावत आहेत. जिल्ह्यातील निम्न तापी पाडळसे प्रकल्पासह शेळगाव बॅरेज, वरखेड लोंढे बॅरेजचे कामही अपूर्ण आहे.

खानदेशात जलसंपदा पुरेशी नसल्याने गिरणा, पांझरा परिसराचा विकास झालेला नाही. अनेक प्रकल्प पूर्ण झाले, पण कालव्यांचा प्रश्‍न राहिला आहे. काही प्रकल्प अपूर्णच आहेत. तर अनेक प्रकल्प फक्त चर्चेत आहेत. गिरणा पट्टा आवर्षणप्रवण आहे. त्यात मागील काही वर्षांत फक्त वरखेड-लोंढे बॅरेजचे काम गिरणा नदीवर चाळीसगावात बऱ्यापैकी झाले.

तर तापी नदीवरील शेळगाव बॅरेजचे कामही मार्गी लागल्याची स्थिती आहे. त्यात आता जलसंचयही होणार आहे. किरकोळ भूसंपादन व पुनर्वसन करायचे आहे. त्याचे काम रखडले आहे.बलून बंधारे प्रकल्प मागील २५-२६ वर्षे चर्चेत आहे. त्यासंबंधी प्रशासकीय स्तरावरील प्रक्रिया मार्गी लागली आहे. निधीची गरज आहे

पाडळसे प्रकल्पासही निधीची गरज आहे. बलून बंधारे प्रकल्पास १५ वर्षांपूर्वी सुमारे ११३० कोटी रुपये निधीची गरज होती. आता या प्रकल्पाची किंमत तीन हजार कोटींवर गेली आहे. चाळीसगाव, पाचोरा, भडगाव व जळगाव तालुक्यांत हे सात बलून बंधारे होणार आहेत. सुमारे साडेचार हजार हेक्टर क्षेत्र व किमान १०० गावांना या प्रकल्पांचा मोठा लाभ होणार आहे. तत्कालीन केंद्रीय जलसंपदामंत्री उमा भारती यांनी या प्रकल्पाचा समावेश केंद्रीय प्रायोगिक प्रकल्पांत केला होता.

महाकाय प्रकल्पाची अपेक्षा

तापी नदीवर महाकाय जलपुनर्भरण प्रकल्पाची संकल्पना तत्कालीन आमदार हरिभाऊ जावळे यांनी पुढे आणली. त्यांनी मोठा पाठपुरावा केला. त्यांच्या खासदारकीच्या काळात बऱ्यापैकी प्रशासकीय कार्यवाही झाली. नंतर हा प्रकल्प रखडला. त्यासाठी सुमारे साडेसहा हजार कोटी रुपये निधीची गरज आठ वर्षांपूर्वी होती. परंतु आता या प्रकल्पाची किंमतही आठ हजार कोटींवर गेली आहे.