Akola News : आजच्या काळात शेतीचे उत्पादन शाश्‍वत करण्यासाठी एकात्मिक शेती पद्धती ही महत्त्वाची बाब झालेली आहे. विदर्भातील शेतकऱ्यांनी या पद्धतीचा अंगीकार केल्यास निश्‍चित फायदा होईल. कृषी विभागाच्या अधिकारी, कर्मचाऱ्यांनी कृषी विद्यापीठाने संशोधित केलेले पिकवाण, यंत्र, तंत्र शेतकऱ्यांच्या बांधापर्यंत पोहोचविण्यासाठी पुढाकार घ्यावा, असे आवाहन डॉ. पंजाबराव देशमुख कृषी विद्यापीठाचे कुलगुरू डॉ. शरद गडाख यांनी केले.

पंदेकृविच्या सभागृहात आयोजित दोनदिवसीय खरीप हंगामपूर्व कार्यशाळेच्या उद्‌घाटन प्रसंगी डॉ. गडाख बोलत होते. या वेळी व्यासपीठावर नानाजी देशमुख कृषी संजिवनी प्रकल्पाचे संचालक परिमल सिंह, आत्मा प्रकल्प संचालक अशोक किरनळ्ळी, महाबीजचे व्यवस्थापकीय संचालक योगेश कुंभेजकर, विस्तार व प्रशिक्षण संचालक रफिक नाईकवाडी, पंदेकृविचे संशोधन संचालक डॉ. विलास खर्चे, शिक्षण विस्तार संचालक डॉ. धनराज उंदीरवाडे, पंजाबराव देशमुख नैसर्गिक शेती मिशनचे सहसंचालक नवनाथ कोळपकर, अमरावती विभागीय कृषी सहसंचालक प्रमोद लहाळे, नागपूर विभागीय कृषी सहसंचालक उमेश घाडगे, यांची व्यासपीठावर प्रमुख उपस्थिती होती.

डॉ. पंजाबराव देशमुख कृषी विद्यापीठाने गेल्या काही वर्षांत जे नावीन्यपूर्ण उपक्रम राबवले त्याची कृषी विभागाच्या अधिकाऱ्यांनी आवर्जून पाहणी करावी. कार्यक्षेत्रातील प्रत्येक जिल्ह्यात मॉडेल व्हिलेज तयार करण्याचे काम सुरू केले आहे. त्यालाही भेट द्यावी.

तेथे सुरू असलेल्या उपक्रमांचा, झालेल्या बदलांचा आवर्जून अभ्यास करावा, असे आवाहनही डॉ. गडाख यांनी आपल्या मार्गदर्शनात केला. परिमल सिंह यांनी ‘पोकरा’च्या आगामी टप्प्याबद्दल माहिती देत त्यातील बाबींचा सविस्तरपणे ऊहापोह केला. प्रास्ताविकात विभागीय कृषी सहसंचालक प्रमोद लहाळे यांनी कार्यशाळेचा उद्देश स्पष्ट केला. सूत्रसंचालन वाशीम जिल्हा अधीक्षक कृषी अधिकारी आरिफ शाह यांनी केले.

आत्माच्या घडी पत्रिकेचे प्रकाशन

मूलस्थानी जल व मृद्‌ संधारण-उपाययोजना या महत्त्वाच्या विषयावर अकोला जिल्हा आत्मा प्रकल्प संचालक आणि कृषी पंजाबराव देशमुख कृषी विद्यापीठाच्या कृषी पद्धती व पर्यावरण केंद्रातर्फे तयार झालेल्या घडी पत्रिकेचे मान्यवरांच्या हस्ते प्रकाशन झाले.