Akola News : यावर्षी पेरणीपासूनच शेतातील पिकांवर संकटांची मालिका सुरूच आहे. बहुतांश भागात सोयाबीनला शेंगाच लागल्या नाहीत. काही भागात सोयाबीनला शेंगा लागल्या असल्यामुळे तरी शेंग परिपक्व होत असताना आता ‘येलो मोझॅक’ मोठ्या प्रमाणात पसरला असल्याने शेंगा परिपक्व होतील याची खात्री उरली नाही.

तर काही भागात करप्याचे आक्रमण झाले आहे. त्यामुळे शेतकऱ्यांचे मोठे नुकसान होणार आहे. यंदाच्या खरिपात पेरणी झालेल्या ५१ हजार ८०५ हेक्टर क्षेत्रापैकी २३ हजार हेक्टरवर सोयाबीनची लागवड आहे.

यावर्षी पेरणीनंतर पाऊस सतत सुरू राहिल्याने पिकाची वाढ व्यवस्थित झाली नाही. पेरणीनंतर पावसामुळे शेतकऱ्यांना निंदणी, खुरपणी, खत, फवारणी, डवरणी आदी व्यवस्थापन वेळेवर करणे शक्य झाले नाही.

त्यामुळे पिके प्रभावित झाली. सततच्या पावसानंतर ऐन फुलधारणेच्या अवस्थेत पडलेल्या धुक्यामुळे सोयाबीनचा फुलोरा गळाला. त्यामुळे बहुतांश भागात सोयाबीनला शेंगा लागलेल्या नाहीत.

काही भागात सोयाबीनला जेमतेम शेंगा लागलेल्या दिसत असतानाच तेथे येलो मोझॅक या रोगाचे आक्रमण झाले. सोयाबीन पिवळे पडत आहे तर काही भागात करपा या रोगाने सोयाबीनची झाडे सुकत आहेत. सोयाबीनच्या उत्पादनात मोठ्या घटीची शक्यता आहे.