Akkalkot News : अक्कलकोट तालुक्याची वरदायिनी म्हणून ओळखल्या जाणाऱ्या कुरनूर धरणात पावसामुळे पाणी येण्यास सुरवात झाली असून, पाणी पातळीत वाढ होऊन ८ टक्के पाणीसाठा झाला आहे. कुरनूर धरण लाभक्षेत्रात गुरुवारी सायंकाळी पडलेल्या पावसामुळे धरणात पाणी येण्यास सुरवात झाली आहे. सध्या धरणात १९७ दशलक्ष घनफूट पाणीसाठा आहे.

धरणाच्या लाभक्षेत्रात गेल्या चार दिवसांपासून सुरू असलेल्या पावसामुळे धरण उपयुक्त पातळीत आले आहे. तसेच गुरुवारी सायंकाळी पडलेल्या पावसामुळे धरणाच्या पाणीपातळीत वाढ होत आहे. यामुळे शेतकरी व परिसरातील नागरिकांमधून आनंद व्यक्त होत आहे.

मागील वर्षी पडलेल्या अत्यल्प पावसामुळे कुरनूर धरणात केवळ ३० टक्केच पाणीसाठा झाला होता. या धरणावर अक्कलकोट तालुक्यातील तीन नगरपालिकांसह ५२ गावांचा पाणीपुरवठा अवलंबून आहे. मात्र, मागील वर्षी साठलेल्या अत्यल्प पाण्यामुळे विशेषतः शेतकऱ्यांवर अस्मानी संकट ओढवले होते.

गावागावातील पाणीपुरवठ्यावर विपरीत परिणाम झाला होता. बोरी व हरणा या दोन नद्यांवर या धरणातील पाणीसाठा अवलंबून आहे. सद्यःस्थितीत हरणा नदी प्रवाहित झाल्याने मायनसमध्ये गेलेले धरण उपयुक्त पातळीत येऊन धरण प्लसमध्ये आलेले आहे.

गुरुवारी चपळगाव, तीर्थ, हालहली अ., हन्नूर, कुरनूर, बावकरवाडी, डोंगरजवळगे व चपळगाव पंचक्रोशीत सुमारे एक तास दमदार पाऊस पडला. यामुळे पाणी पातळीत झपाट्याने वाढ होत झाली. बोरी व हरणा नदीपात्रात मृग नक्षत्राच्या पावसामुळे पाणी येत आहे. बोरी नदीपात्रातून पाण्याचे प्रमाण कमी आहे तर हरणा नदीपात्रातून पाण्याचे प्रमाण जास्त आहे. १२ जूनपर्यंत धरणात दीड फूट (३.५%) पाणी होते. गुरुवारी पडलेल्या पावसामुळे धरणाच्या पाणीसाठ्यात वाढ झाली आहे.