Pune/Ahmednagar News : राज्याच्या विविध जिल्ह्यांमध्ये सुरू असणाऱ्या दमदार पावसामुळे अनेक ठिकाणी सखल भागात पाणी साचले आहे. तर विविध जिल्ह्यात पूरस्थिती निर्माण झाली आहे. यादरम्यान पुण्यासह अहमदनगर जिल्ह्यात गेल्या चार दिवसापासून सुरू असणाऱ्या मुसळधार पावसामुळे जिल्ह्यासाठी वरदान ठरणाऱ्या मुळासह खडकवासला धरणाच्या पाणी पातळीत वाढ झाली आहे.

पाणलोट क्षेत्रात अतिमुसळधार पाऊस

पुणे शहराला खडकवासलासह धरण साखळीतील चारही धरणांच्या पाण्यावर अवलंबून राहावे लागते. यंदा चारही धरणातील पाण्याची पातळी घटली होती. त्यामुळे पुणेकरांचे सर्व लक्ष वरूण राज्याकडे लागले होते. यादरम्यान गेल्या चार दिवसापासून सुरू असणाऱ्या मुसळधार पावसामुळे खडकवासला धरण साखळीतील चारही धरणांच्या पाणी पातळीत वाढ झाली आहे. पाणलोट क्षेत्रात अतिमुसळधार पाऊस पडल्याने बुधवारपर्यंत (ता.२४) ६९.५३ टक्के पाणीसाठा जमा झाला आहे. ज्यामुळे पुणेकरांची पुढील वर्षभराची पाण्याची चिंता मिटली आहे.

शहराला टेमघर, वरसगाव, पानशेत आणि खडकवासला या चार धरणांमधून पाणीपुरवठा होतो. बुधवारी पहाटे साडेतीन वाजता खडकवासला धरण १०० टक्के भरले. त्यानंतर धरणातून मुळा नदीत पाण्याचा विसर्ग सुरू करण्यात आला आहे. या पार्श्वभूमीवर नदीपात्रालगतच्या नागरिकांना सतर्कतेचा इशारा जलसंपदा विभागाने दिला आहे. टेमघर २.१२ टीएमसी (५७.२७), वरसगाव टीएमसी ८.०४ (६२.७४), पानशेत ८.१३ टीएमसी (७६.३१)खडकवासला १.९७ टीएमसी (१००) असे चारही धरणात २०.२७ टीएमसी (६९.५३) पाणीसाठा झाला आहे.

तसेच मुळाधरणात हंगामातील सर्वाधिक आवक

दरम्यान अहमदनगर जिल्ह्यातील सर्वाधिक मोठे असणाऱ्या मुळाधरणात देखील बुधवारी हंगामातील सर्वाधिक आवक झाली. २६ हजार दशलक्ष घनफूट क्षमतेच्या मुळाधरणात बुधवारी सायंकाळी सहा वाजता १११३५ दशलक्ष घनफूट पाणीसाठा होता. त्यात २५८२८ क्युसेक कोतूळ येथील आवक झाल्याचे नगर पाटबंधारे कार्यकारी अभियंता सायली पाटील व शाखा अभियंता राजेंद्र पारखे यांनी ही माहिती दिली. तर मागिल २४ तासात धरणात तब्बल पाऊण टीएमसी पाणी जमा झाल्याचे कार्यकारी अभियंता पाटील यांनी सांगितले.

यावेळी कोतुळ येथून लहित खुर्द येथील जलमापन केंद्रावर १६ हजार ७५० क्युसेक पाण्याची आवक झाल्याची नोंद झाली. ती दुपारी २४४५२ क्युसेक पाण्याची आवक झाली. तर हवामानशास्त्र विभागाने दिलेल्या अंदाजानुसार पाऊस झाल्यास मुळा धरण दोन दिवसात निम्मे भरण्याची शक्यता असल्याचेही कार्यकारी अभियंता पाटील यांनी सांगितले