Sindhudurg News : सिंधुदुर्ग जिल्ह्यात भातरोप पुनर्लागवड केलेल्या पिकांचे गव्यांकडून सध्या नुकसान सुरू आहे. दहा ते बारा गव्यांचे कळप गावागावातील जंगलात असून त्यांच्याकडून पिकांचे नुकसान होत असल्याने शेतकऱ्यांमध्ये चिंतेचे वातावरण आहे.

जिल्ह्यात गव्यांची संख्या झपाट्याने वाढत आहे. गेल्या सहा ते सात वर्षांत गव्यांची संख्या अनेक पटींनी वाढली आहे. जिल्ह्यातील डोंगर आणि जंगल परिसरात अधिकतर गव्यांचा वावर आहे. वैभववाडी, कणकवली, कुडाळ, सावंतवाडी, मालवण, दोडामार्ग या तालुक्यांमध्ये हजारो गवे आहेत.

एका एका कळपात सहा ते तेरा पर्यंत गवे असतात. दिवसभर जंगलात गव्यांचे वास्तव्य असते. परंतु सायंकाळ होताच ते जंगलापासून नजीक असलेल्या भातपिकांमध्ये घुसून नुकसान करण्यास सुरुवात करतात. गेल्या आठ ते दहा दिवसांत जिल्ह्यातील खांबाळे, सांगुळवाडी, करूळ, सडुरे, शिराळे, कुर्ली (ता. वैभववाडी), हरकुळ, नरडवे (ता. कणकवली), माणगाव, हुमरमळा, वालावल (ता. कुडाळ) या गावांमध्ये गव्यांनी मोठ्या प्रमाणात भातपिकांचे नुकसान केले.