Jalgaon News : खानदेशात रब्बी हंगामात ज्वारीची पेरणी काहीशी कमी आहे. परंतु तापी, अनेर, पांझरा, गिरणा आदी नद्यांच्या क्षेत्रातील पीक निसवले आहे. कोरडवाहू दादर ज्वारीही जोमात असून, कोवळ्या दाण्यांवर पक्षी हल्ला चढवत असल्याने शेतकरी ज्वारी राखण्याच्या लगबगीत आहे.

खानदेशात यंदा सुमारे ३९ हजार हेक्टरवर ज्वारीची पेरणी झाली आहे. ही पेरणी मका पिकापेक्षा अधिक आहे. कारण ज्वारीचे दर टिकून होते. तसेच पुढे चाऱ्याची समस्या तयार होईल, यासाठी ज्वारीच्या चाऱ्यासही मोठी मागणी राहील. यामुळे अनेकांनी मका व इतर पिकांची लागवड, पेरणी कमी करून ज्वारीची पेरणी केली आहे.

कोरडवाहू दादर ज्वारीची पेरणी अपेक्षेपेक्षा कमी झाली आहे. परंतु पेरणीत मोठी घट झालेली नाही. अनेक ठिकाणच्या शेतात रब्बी हंगामातील मुख्य ज्वारीचे पीक आता दुल्ल्यात आले आहे. तालुक्यातील बळीराजा या पिकाचे पाखरांपासून संरक्षण करण्यात व्यस्त राहात आहे.

बांधावरून पाखरे हाकली जात आहेत. पाखरे हाकण्यासाठी वापरली जाणारी गोफण फारशी दिसत नसली तरी सध्या ती शेतकऱ्यांच्या हातात दिसत आहे. या तालुक्याच्या शेतशिवारात ‘सोन्याचं घुंगरू गोफणीला, ज्वारीचं पीक आलंय राखणीला’ असेच वातावरण आहे. पेरणी केलेल्या ज्वारी पिकाच्या कणसात दाणा भरू लागला असून, पाखरांनाही खाण्याची कमतरता असल्याने ज्वारी पिकावर भरपूर प्रमाणात पाखरे येऊ लागल्याने शेतकरी या पिकाची राखण करताना दिसून येत आहे.

पूर्वी प्रत्येक गावाच्या आठवडा बाजारात गोफण विक्रीस येत होती, परंतु आता ती दुर्मीळ आली आहे. कारण ज्वारीचे पीक कमी झाले आहे. पर्यायाने गोफणीची मागणी कमी राहात आहे. त्यामुळे गोफणी मोठ्या प्रमाणात तयार देखील केल्या जात नाहीत हे विशेष. कमी खर्च व अधिक नफा देणारे पीक म्हणून अनेक शेतकरी ज्वारी पीक घेत आहे.

जळगाव जिल्ह्यात चोपडा, जळगाव, अमळनेर, भडगाव, चाळीसगाव, पाचोरा या भागांत ज्वारी पीक अधिक आहे. भडगावातील खेडगाव व लगत ज्वारीचे मोठे क्षेत्र आहे. धुळ्यात शिरपूर, शिंदखेडा व धुळे तालुक्यांत ज्वारी पीक असून, नंदुरबारात शहादा, तळोदा, नंदुरबार भागात ज्वारीची पेरणी बऱ्यापैकी झाल्याची माहिती मिळाली.

दुष्काळी भागात पेरणी कमी

अनेक मंडळांत दुष्काळी परिस्थिती असल्याने पाऊस वेळेवर न पडल्याने यावर्षी ज्वारीची पेरणी कमी झाली आहे. या दुष्काळी परिस्थितीत काही शेतक-यांनी ज्वारीचे पीक मोठ्या कष्टाने जोपासले असून या पिकात दाणा भरू लागला आहे. परिसरात पाखरांना खाण्यासाठी काही नसत्याने या शेतकऱ्यास पाखरांची राखण करावी लागत असून, ज्वारीच्या पिकात माचवा करून त्यावर उभारून राखण करण्याचे चित्र आता दुर्मीळ झाले आहे.