Land Information : एका गावात बुडित क्षेत्रामध्ये चालू वर्षी धरणाचे पाणी साठविण्यात येणार होते. परंतु भूसंपादनाचे काम मात्र काही कारणामुळे मागे रेंगाळले होते. अजूनही भूसंपादन सुरू झाले नाही, हे पाहून गावातल्या एका माणसाने रात्रीतून एक छोटी झोपडी ३०० रुपयांत बनवून घेतली व सरकार दरबारी अर्ज करून माझ्या घराचे पैसे अद्याप मिळाले नाहीत, असा कांगावा त्याने केला.

भूसंपादन करताना संयुक्त मोजणीच्या वेळी मोजमाप अधिकाऱ्याने चौकशी केल्यावर त्यांच्या निदर्शनास वस्तुस्थिती आली, की त्या वेळी ही झोपडी नव्हती. मोजमाप अधिकाऱ्याने गावातील लोकांबरोबर स्थानिक चौकशी केल्यावर त्यांच्या असे लक्षात आले, की धरणाच्या बुडित क्षेत्रातील गावातील किमान ३०-४० लोकांनी अशाच पद्धतीने रेडिमेड झोपड्या शेतात आणून टाकल्याचे स्पष्ट झाले.

गावातील काही स्थानिक धरणग्रस्तांच्या नेत्यांनी तीन ते चार वेळा अशा घरांचा मोबदला मिळाला नसल्याबद्दल जिल्हा कचेरीवर मोर्चेदेखील काढल्याचे निदर्शनास आले. परंतु मोजमाप अधिकाऱ्यांच्या नंतर लक्षात आले, की मोर्चे वगैरे हे सगळे सरकारला फसविण्यासाठी केलेले एक सोंग होते आणि त्यांनी आपल्या स्वतःच्या स्वार्थासाठी या लोकांना गोळा करून हा प्रकार केल्याचे निष्पन्न झाले.

सांगावयाचे तात्पर्य म्हणजे धरणाच्या बुडित क्षेत्रात तात्पुरत्या झोपड्या टाकून जास्त मोबदला रक्कम सरकारकडून मिळविण्याचा प्रयत्न निषेधार्ह आहे व याचा परिणाम खऱ्या धरणग्रस्तांवर अन्याय करणारा आहे.