Hingoli News: खुदनापूर गावातील (ता.वसमत. जि.हिंगोली) शेतकरी किशनराव चव्हाण या शेतकऱ्यांना उभ्या पिकावर रोटाव्हेटर फिरवल आहे. यंदाच्या मान्सून हंगामात कमी पावसासह पिकावरील किडीमुळे उत्पादन खर्चात वाढ झाली. परंतु सोयाबीन पिकाला उत्पन्नाची हमी राहिली नसल्यामुळे शेतकऱ्याने चिंतातूर होऊन सोयाबीनवर रोटाव्हेटर फिरवला. 

मागील तीन वर्षापासून राज्यातील सोयाबीन उत्पादकांना अस्मानी आणि सुल्तानी संकटाचा दुहेरी फटका बसत आहे. सोयाबीन पिकावर मिलीपीड (पैसा) कीडीनं हल्ला केल्याने किशनराव चव्हाण या शेतकऱ्याच मोठ्या प्रमाणात नुकसान झालं.

त्यामुळे त्यांनी तीन एकर सोयाबीन पिकावर रोटाव्हेटर फिरवून नष्ट केलं. सोयाबीन पिकावर सुमारे २० हजार रुपये खर्च करूनही आता काहीच हातात उरलं नसल्याची व्यथा त्यांनी व्यक्त केली आहे. 

पावसाअभावी आणि कीटकांमुळे पिकं बरबाद

जून महिन्यात पावसाच्या आगमनानंतर शेतकऱ्यांनी आशेने पेरणी केली होती. मात्र, जुलै संपत आला तरी हिंगोली जिल्ह्यात पुरेसा पाऊस झाला नाही. पावसाअभावी पिके आधीच अशक्त झाली होती. त्यातच मिलीपीड (पैसा) या कीडीनं सोयाबीन पिकाची वाताहत केली. चव्हाण यांनी कीड नियंत्रणासाठी विविध प्रकारच्या औषधांचा वापर केला, मात्र त्याचा काहीही परिणाम झाला नाही. परिणामी अखेर त्यांनी तीन एकरातील उभं पिक  रोटावेटर फिरवून नष्ट केलं.

कृषी विभाग, विमा कंपनीकडून मदत नाही

किशनराव चव्हाण यांनी सांगितले की, “या पिकावर आतापर्यंत सुमारे २० हजार रुपये खर्च झाले होते. परंतु पुढे आणखी खर्च करूनही काही फायदा होणार नाही, असे लक्षात आल्याने मी पिक नष्ट करण्याचा निर्णय घेतला. तसेच विमा कंपनी आणि कृषी विभागाला कळवले असूनही अद्याप कोणतीही मदत मिळालेली नाही” अशी खंत त्यांनी व्यक्त केली.