Nanded News : नांदेड जिल्ह्यात बुधवारी (ता. ३१) नांदेड, कंधार, अर्धापूर, लोहा, उमरी, धर्माबाद, भोकर व मुदखेड तालुक्यांत जोरदार पाऊस झाला. या पावसामुळे जिल्ह्यातील कंधारमधील दोन, तर लोहा तालुक्यातील तीन अशा पाच मंडलांत अतिवृष्टीची नोंद झाली आहे.

गुरुवारी सकाळपर्यंत जिल्ह्यात सरासरी २२.४० मिलिमीटर पाऊस झाला आहे. एक जून ते आजपर्यंत नांदेडमध्ये ४७८.९० मिलिमीटरनुसार ११७.४६ टक्के पावसाची नोंद झाली आहे. हा पाऊस वार्षिक सरासरीच्या ५३.७३ टक्के नोंदल्याची माहिती मिळाली.

जिल्ह्यात मागील महिन्यातील सात तारखेपासून सतत पाऊस सुरू आहे. या पावसामुळे खरिपातील आंतरमशागतीची कामे ठप्प झाली आहेत. संततधार पावसामुळे पिकांची वाढही खुंटली आहे. शेतात पाणी साचल्याने पिके पिवळी पडली आहेत.

मागील दोन दिवसांपूर्वी काहीसा मंदावलेल्या पावसाने बुधवारी जोरदार हजेरी लावली. या पावसामुळे जिल्ह्यातील चार मंडलांत अतिवृष्टीची नोंद झाली. बुधवारी झालेला पाऊस कंधार, लोहा, उमरी, धर्माबाद, भोकर, नांदेड तालुक्यांत सर्वाधिक होता. यामुळे कंधार व लोहा तालुक्यांतील पाच मंडलांत अतिवृष्टीची नोंद झाली. गुरुवारी सकाळपर्यंत जिल्ह्यात सरासरी २२.४० मिलिमीटर पाऊस झाला आहे.

अतिवृष्टी झालेली मंडले

लोहा ९९, सोनखेड ९९, माळाकोळी ६९, कंधार ६७, फुलवळ ६७.८०.

तालुकानिहाय झालेला पाऊस

नांदेड ३०.३०, बिलोली १२, मुखेड - एक, कंधार ३४.७०, लोहा ७१.२०, हदगाव ९, भोकर ३५.५०, देगलूर ०.५०, किनवट ८.४०, मुदखेड २४.६०, माहूर २.७०, धर्माबाद ४१, उमरी ४४, अर्धापूर ३८, नायगाव २६. सरासरी २२.४० मिलिमीटर.