Satara News: कोयना धरणाच्या पाणलोट क्षेत्रात पावसाचा जोर कायम असल्याने पाण्याची आवक वाढली आहे. यामुळे धरण व्यवस्थापनाकडून शुक्रवारी (ता.२०) पाण्याचा विसर्ग सुरू करण्याचा निर्णय घेतला आहे. शुक्रवारी सकाळी नऊ वाजता पायथा विद्युत गृहाचे एक युनिट सुरू करून १०५० क्युसेक विसर्ग करण्यात आला आहे.

कोयना धरणाच्या पाणलोट क्षेत्रात गेल्या चार दिवसांपासून दमदार पाऊस सुरू आहे. यामुळे धरणाच्या पाणीपातळीत मोठी वाढ होत आहे. धरण कार्यक्षेत्रात गेल्या २४ तासांत कोयना ८७, नवजा ९८ व महाबळेश्वर ९४ मिलिमीटर पावसाची नोंद झाली आहे.

धरणात प्रतिसेकंद ५१,०२२ क्युसेक पाण्याची आवक होत आहे. धरणात ४.४१ टीएमसीने वाढ झाली आहे. धरणात शुक्रवारी सकाळी नऊ वाजता ३२.५१ टीएमसी (३०.८९ टक्के) पाणीसाठा झाला आहे. सकाळी नऊ वाजता पायथा विद्युत गृहाचे एक युनिट सुरू करून १०५० क्युसेक विसर्ग कोयना नदीपात्रात करण्यात आला आहे.

यामुळे नदीकाठच्या गावांना सतर्क राहण्याचा इशारा प्रशासनाच्या वतीने देण्यात आला आहे. कण्हेर धरणाच्या पाणलोट क्षेत्रामधील पावसामुळे धरणाची पाणीपातळी नियंत्रित करण्यासाठी शुक्रवारी दुपारी एक वाजता धरण पायथा विद्युतगृहाचे जनित्र सुरू करून ५०० क्युसेक विसर्ग वेण्णा नदीपात्रात सोडण्यात आला आहे.

इतरही धरणाच्या पाणलोट क्षेत्रात पाऊस सुरू असल्याने पाणीसाठ्यात वाढ होत आहे. धोम ५.५९, धोम-बलकवडी ०.५३, कण्हेर ५.४९, उरमोडी ४.४९, तारळी १.७७ टीएमसी असा एकूण सहा धरणांत ५१.८३ टीएमसी (३४.८५ टक्के) पाणीसाठा झाला आहे.