Sangli News : सांगली जिल्ह्यातील द्राक्ष उत्पादकांनी यंदाची फळछाटणी उपलब्ध पाण्यावर केली आहे. सध्या ३० टक्के फळछाटणी पूर्ण झाली आहे. परंतु शेतकरी अजूनही पावसाच्या प्रतीक्षेत आहे. यंदा पाण्याची कमतरता भासत असल्याने फळ छाटणीच्या प्रारंभापासूनच पाणी टंचाईचे ग्रहण लागले आहे. त्यामुळे द्राक्ष उत्पादक संकटात सापडला आहे.

जिल्ह्यात द्राक्षाचे क्षेत्र सुमारे १ लाख ५० हजार एकरांवर आहे. गेल्या चार महिन्यांत अवघा ५० टक्के पाऊस झाला आहे. परिणामी, भूजल पातळी वाढली नाही. त्यातच पाणीटंचाई कमी करण्यासाठी म्हैसाळ, टेंभू आणि ताकारी योजना सुरू केल्याने या लाभ क्षेत्रातील शेतकऱ्यांना दिलासा मिळाला. त्यामुळे शेतकऱ्यांनी उपलब्ध पाण्यावर फळछाटणीचे नियोजन सुरु केले. ऑगस्टपासूनच फळछाटणी सुरू आहे. सुमारे ३० टक्के क्षेत्रावर फळ छाटणी झाली आहे. सध्या योजनांमुळे पाणीटंचाई फारशी जाणवत नसली तरी, पुरेसा पाऊस नसल्याने शेतकरी हवालदिल झाले आहेत.

दुष्काळी भागात छाटणी लवकर

जत तालुक्यासह आटपाडी, कवठेमहांकाळ तालुक्यांत दरवर्षी ऑक्टोबरच्या पहिल्या आठवड्यात फळ छाटणी केली जाते. परंतु पाण्याची समस्या मोठी आहे. पावसाची चिन्हे दिसत नाहीत. त्यामुळे यंदाच्या हंगामात दुष्काळी तालुक्यातील शेतकऱ्यांनी १५ ते २० दिवस अगोदर म्हणजे सप्टेंबरच्या दुसऱ्या आठवड्यापासून फळछाटणीस प्रारंभ केला आहे.