Pali News : पावसाळा नुकताच सरला आहे. त्यामुळे नदी, तलाव, ओहळ, शेतात काही प्रमाणात पाणी आहे. या गोड्या पाण्यातील मासेमारी सध्या जोरात सुरू आहे. यात विविध मासे मोठ्या प्रमाणात आढळत असून खवय्यांच्या उड्या त्यावर आहेत. चविष्ट गोड्या पाण्यातील मासे आणि चिंबोऱ्यांवर ताव मारत आहेत. हे मासे सध्या बाजारात उपलब्ध होत असल्याने खवय्यांना मेजवानी मिळत आहे.

नदीकिनारी, ओहळ, शेतात आणि डोंगर कपारीत सापडणाऱ्या गोड्या पाण्यातील विषेशतः काळ्या पाठीच्या चिंबोऱ्या सध्या मुबलक मिळत आहेत. पौष्टिक आणि चविष्ट अशा या चिंबोऱ्या खवय्ये चवीने खातात. तसेच नद्या, तलाव, धरण, पाणवठे, ओढे, ओहळ, शेतात साठलेले पाणी अशा गोड्या पाण्यात सापडणाऱ्या माशांची आवकही वाढली आहे.

त्यामध्ये मळे, कोलीम, म्हूऱ्या, शिवडा, अरलय, वाम, कोळंबी, कटला, फंटूस व खवल आदी माशांचा समावेश आहे. मळे व म्हूऱ्या हा प्रकार या दिवसांत अधिक मिळतो. त्यामुळे खवय्ये आवर्जून खरेदी करतात.

काही जण तर मुंबई, ठाणे आदी शहरात राहणाऱ्या आपल्या नातेवाईकांना भेटही देतात. कोळी बांधवांबरोबरच प्रामुख्याने आदिवासी आणि गळभोई समाजातील लोक मेहनतीने हे मासे व चिंबोऱ्या पकडतात. ते विकून त्यांच्या हाती चार पैसे मिळतात.

मासळीचे दर (रुपयांत)

मासळी प्रकार यंदाचे दर मागील वर्षी

मळे (किलो) २०० १५०

(बारीक कोळंबी) ४० ३०

म्हूऱ्या ४० ३०

शिवडा, कटला व वाम ५५० ४००

मोठी गोडी कोळंबी १२०० १०००

फंटूस ३०० २५०