Nagar News : मागील पंधरा दिवसांत दोन दिवस झालेला पाऊस, त्यानंतर लगेचच सलग दोन दिवस पडलेले धुके याचा राज्यात ज्वारीच्या पिकाच्या साधारण ४० टक्के क्षेत्रावर परिणाम झाला आहे. ज्वारीच्या कणसांवर नावा, चिकटा व बुरशीजन्य रोगाचा प्रादुर्भाव झाला असून कणसे काळसर पडली आहेत. उशिराने पेरणी झालेल्या ज्वारीवर प्रादुर्भाव अधिक आहे.
राज्यात यंदा खरीप हंगामात पुरेसा पाऊस नसल्याने पिकांचे पाण्याअभावी अनेक भागात नुकसान झाले. त्यामुळे यंदा रब्बीत कोरडवाहू भागात ज्वारीचे क्षेत्र वाढले आहे. राज्यात ज्वारीचे सरासरी १७ लाख ५३ हजार ११८ हेक्टर सरासरी क्षेत्र आहे. यंदा आतापर्यंत पंधरा लाख हेक्टरच्या जवळपास पेरणी झाली आहे. कमी पाण्यात येणारे पीक म्हणून ज्वारीकडे पाहिले जाते.
मात्र पुरेसा दर नसल्याने आणि मजुरांची अडचण असल्याने गेल्या दहा वर्षांपासून ज्वारीचे क्षेत्र कमी झाले. यंदा पाणीटंचाईमुळे गेल्या वर्षीपेक्षा एक लाख ५५ हजार हेक्टरच्या जवळपास ज्वारीचे अधिक वाढले आहे. मागील पंधरा दिवसांत अचानक वादळी पाऊस झाला. दोन दिवस संततधार पाऊस पडला.
पाऊस उघडल्यानंतर लगेचच सलग दोन दिवस धुके पडले. त्या अवकाळी पावसाचा आणि धुक्याचा ज्वारीवर गंभीर परिणाम झाला आहे. राज्यात मागील पंधरवाड्यात झालेल्या पाऊस, धुक्याचा ४० टक्के म्हणजे चार लाख हेक्टर क्षेत्राच्या जवळपास फटका बसण्याची शक्यता आहे.
- ज्वारीच्या कणसांवर मावा, चिकटा व बुरशीजन्य रोगाचा प्रादुर्भाव झाला असून पाने पिवळी व कणसे काळसर पडली आहेत.
- उशिराने पेरणी झालेल्या ज्वारीवर अधिक परिणाम, बागायती भागात प्रादुर्भावाचे प्रमाण अधिक
- त्यातून चारा उत्पादनाला फटका बसण्याची शक्यता.
- नगर, पुणे, सोलापूर, सातारा, सांगली, छत्रपती संभाजीनगर, जालना, बीड, लातूर, धाराशिव जिल्ह्यांत अधिक क्षेत्रावर कणसाचे नुकसान
- राज्यातील काही भागात कांदा, गव्हावरही मावा, करप्याचा प्रादुर्भाव.
पाऊस आणि धुक्याचा परिणाम होऊन ज्वारीची कणसे काळी पडली आहे. महात्मा फुले कृषी विद्यापीठाच्या बीजोत्पादन क्षेत्रावरील ज्वारीलाही याचा फटका बसण्याची शक्यता आहे. ज्या कणसात दाणे पोसले नाहीत, तेथे उत्पादनावर परिणाम होऊ शकतो. कणसे काळी पडली असलेल्या ज्वारीवर फवारणी करणेही शक्य नाही.डॉ. दीपक दुधाडे, वरिष्ठ शास्त्रज्ञ, ज्वारी सुधार प्रकल्प, महात्मा फुले कृषी विद्यापीठ
यंदा ज्वारी चांगली येईल अशी आशा होती. मात्र काही दिवसांपूर्वी झालेल्या पाऊस, धुक्याने कणसे काळी पडली. मावा व चिकटाही पडला. त्याचा फटका यंदाही सोसावा लागणार आहे.कैलास टुमकर, ज्वारी उत्पादक शेतकरी, जाधववाडी (ता. जि. नगर)
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.