Palghar News : दोन महिन्यांच्या मासेमारी बंदीनंतर अखेर डहाणू बंदरात मासेमारी हंगामाला शुक्रवार (ता. १)पासून औपचारिक सुरुवात झाली. पहाटेपासूनच सुसज्ज बोटींसह शेकडो मच्छीमार समुद्रात मासेमारीसाठी रवाना झाले असून, बंदर परिसरात उत्साहाचे वातावरण निर्माण झाले होते.

डहाणू बंदरात सुमारे ५०० ते ६०० लहान-मोठ्या बोटींच्या साह्याने पारंपरिक पद्धतीने मासेमारी केली जाते, मात्र मागील पाच वर्षांपासून समुद्रात समाधानकारक मासळी मिळत नसल्यामुळे अनेक मच्छीमार आर्थिक अडचणीत सापडले आहेत.

विशेषतः बोंबील, मांदेली, करंदी, पाळा यांसारख्या लहान मासळीखेरीज घोळ, दाढे यांसारखे महागडे मासे दुर्मिळ झाल्याने उत्पन्नात घट झाली आहे. दरवर्षीप्रमाणे यंदाही १ जून ते ३१ जुलै दरम्यान राज्य सरकारच्या आदेशानुसार यांत्रिक बोटींवर मासेमारी बंदी लागू होती.

या कालावधीत समुद्र खवळलेला असतो, तसेच मासळीच्या पैदाशीसाठीही हा काळ महत्त्वाचा मानला जातो. परिणामी, लहान बोटीधारक मच्छीमारही मासेमारीस टाळतात.

बंदीच्या दोन महिन्यांत मच्छीमारांनी आपापल्या बोटींची दुरुस्ती, रंगरंगोटी, जाळी विणणे आदी कामे पूर्ण केली, मात्र या काळात उदरनिर्वाहाचे कोणतेही साधन नसल्याने बहुतांश कुटुंबे आर्थिक संकटात सापडली होती. त्यामुळे हंगामाच्या सुरुवातीस नव्या आशा आणि अपेक्षांनिशी मच्छीमार समुद्रात उतरले आहेत.

नारळी पौर्णिमेची प्रतीक्षा

डहाणू बंदरावर सकाळपासूनच हलकल्लोळ दिसून आला. बोटींच्या इंजिनांचा आवाज, जाळ्यांचे गाठोडे, खरेदीसाठी येणारे व्यापारी आणि स्थानिक नागरिकांनी मिळून हंगामाच्या सुरुवातीला सजीवतेचा नवा रंग दिला आहे.

मासेमारीला खरी सुरुवात नारळी पौर्णिमेनंतरच होते. अनेक मच्छीमार पारंपरिकरीत्या समुद्राची पूजा नारळ अर्पण केल्यानंतरच खऱ्या अर्थाने मच्छीमारीला सुरुवात करतात.