Akola News : सध्या खरीप हंगामात लागवड झालेल्या पिकांची वाढीची अवस्था सुरू झाली आहे. त्यामुळे सर्वत्रच विविध रासायनिक खतांची मागणी वाढू लागली आहे. अशातच कृषी केंद्रांवर खरेदीसाठी गेलेल्या शेतकऱ्यांना खत दरवाढीचा फटका सहन करावा लागतो आहे.

मागील काही दिवसांत मागणी असलेल्या खतांची दरवाढ झालेली असून त्याची अंमलबजावणीही तत्काळ होत आहे. प्रामुख्याने केळी, कपाशी व इतर प्रमुख पिकांसाठी वापर असलेल्या पोटॅशचा दर प्रतिबॅग आता १८०० रुपयांवर जाऊ पोचला आहे. इतरही खते कमी-अधिक प्रमाणात वाढल्याने शेतकऱ्यांचा खिसा खाली होत आहे.

सध्या पिकांना मात्रा देण्यासाठी मोठ्या प्रमाणात खतांची मागणी वाढलेली आहे. कृषी केंद्रावर शेतकरी खतांसाठी गर्दी करीत आहेत. काही भागात आधीच १०.२६.२६, युरिया, डीएपी या मागणी असलेल्या खतांची उपलब्धता नाही. असेल तर यापैकी काही खते ही दुसरी खते घेतल्याशिवाय दिली जात नाहीत, तर कुठे पुरवठाच झालेला नाही, अशी वस्तुस्थिती आहे.

पिकांमध्ये फळधारणा, फळपरिपक्वतेच्या अवस्थेत पोटॅश या खताची मागणी वाढते. काही दिवसांपूर्वीच या खताचा दर १५३५ रुपयांवरून आता थेट १८०० रुपये एवढा करण्यात आला आहे. सोबत १५.१५.१५ हे १४७० वरून १६५० रुपये झाले आहे.

१०.२६.२६ चा दर आधी १४७० होता आता तो १८५० रुपयांपर्यंत पोचल्याचे विक्रेते सांगत आहेत. २०.२०.००.१३ हे खत १३०० वरून १४०० करण्यात आले. ८.२१.२१ हे खत आधी १८०० रुपयांनी विकले जायचे ते आता १९७५ रुपये एवढे झाले आहे. यासोबतच १६.१६ व इतरही खतांच्या किमतीत मोठी वाढ झाल्याने शेतकऱ्यांचा पिकासाठीचा खर्च आणखीच वाढला आहे.

खतांच्या वाढत्या किमतींचा थेट परिणाम शेतकऱ्यांच्या उत्पादन खर्चावर होत आहे. आधीच बियाणे, मजुरी, कीडनाशके यांचे दर वाढले असताना आता खत दरवाढीमुळे शेतकऱ्यांपुढे आर्थिक अडचणी वाढण्याची शक्यता आहे. दरम्यान सातत्याने दरवाढ होत असल्याने शेतकऱ्यांना मोठा फटका बसतो आहे.