Amravati News : मोर्शी, वरुड, चांदूरबाजार व अचलपूर भागांत गारपीट, वादळीवाऱ्यासह पावसाने हजेरी लावली. आता वातावरण निवळले असले तरी संत्रा बागांत बुरशीजन्य रोगांचा प्रादुर्भाव होण्याची भीती वर्तविली जात आहे.

लिंबूवर्गीय पीक तज्ज्ञांनी दिलेल्या माहितीनुसार, गारपिटीमुळे संत्र्याच्या आंबिया बहराच्या फळांची गळ झाली. त्यासोबतच लिंबाच्या हस्त बहरालाही फटका बसला. त्यामुळे संत्रा, मोसंबी आणि लिंबू या तीनही पिकांत बहरा संदर्भाने व्यवस्थापन करणे गरजेचे ठरणार आहे. अन्यथा या पिकांमध्ये बुरशीजन्य रोगांचा प्रादुर्भाव होण्याची भीती आहे.

यामध्ये फायटोप्थोरा, कोलेट्रोटिकम, डिप्लोडिया, अल्टरनारिया आदी बुरशींचा समावेश आहे. गारांचा मारा बसत खरचटलेल्या सालीमधून या बुरशी शिरकाव करतात. त्यासोबतच पानांना मार लागल्याने ती फाटतात तर मोठ्या प्रमाणात पानांची देखील गळ होते. यामुळे सूर्यप्रकाशात अन्न बनविण्याची प्रक्रिया मंदावते.

त्याचा परिणाम लहान फळांच्या गळतीवर होतो, असेही तज्ज्ञांनी सांगितले. विद्यापीठांतील तज्ज्ञांच्या सल्ल्यानुसार रासायनिक उपाययोजना कराव्यात. झाडे उन्मळून पडली असल्यास किंवा झाडाची मुळे उघडी असल्यास मातीचा भर देऊन काडीच्या साहाय्याने आधार देत उभे करणे महत्त्वाचे आहे, असे अकोला डॉ. पंजाबराव देशमुख कृषी विद्यापीठाचे फळ शास्त्रज्ञ डॉ. दिनेश पैठणकर यांनी सांगितले.

गारपीट व अवकाळी पावसामुळे संत्रापट्ट्यात सर्वाधिक ४३ हजार हेक्‍टरवरील नुकसानीचा अंदाज प्राथमिक सर्वेक्षणात वर्तविण्यात आला आहे. त्याची दखल घेत शासनाने भरपाई द्यावी, अशी माणगी जोर धरत आहे.