Sangali News: ‘‘गेल्या हंगामातील फरक आणि चालू हंगामातील दरासाठी शेतकरी संघटना आंदोलन उभे करेल. कारखाना सभासदांनी वार्षिक सभांमध्ये चुकीच्या गोष्टींना पाठबळ देऊ नये. हक्क मागावा,’’ असे आवाहन शेतकरी संघटनेने केले आले. तर पतसंस्थांनी चुकीच्या पद्धतीने वसुली सुरू केली आहे, असा आरोपही बैठकीत करण्यात आला.

शेतकरी संघटनेची ऊस दराबाबत नुकतीच बैठक झाली. या बैठकीला जिल्हाप्रमुख रामचंद्र कणसे, शीतल राजोबा, रावसो दळवी, चंद्रकांत शिरोटे, तृषांत मगदूम, संतोष देवकर आदी उपस्थित होते.

संजय कोले म्हणाले, ‘‘ज्येष्ठ नेते शरद पवार यांच्या अध्यक्षतेखाली झालेल्या राज्य सरकार, राज्य सहकारी साखर कारखाना संघ व ऊस तोडणी कामगार संघटना बैठकीतील वाटाघाटीनुसार २०२३-२४, २०२४-२५, २०२५-२६ ऊस गळीत हंगामासाठी तोडणी, वाहतूक दर ठरवण्यात आला आहे.

त्यानुसार २५ किलोमीटर अंतरातील उसासाठी कारखान्याच्या गट कार्यालयातील कर्मचाऱ्याचा खर्च धरून ऊस तोडणी, वाहतूक खर्च प्रतिटन ७५० ते ७७० रुपये होतो. कारखान्यांच्या येत्या वार्षिक सर्वसाधारण सभेत याहून अधिक खर्चाला सभासदांनी मान्यता देऊ नये. गुजरात राज्यातील कारखान्यांचा तोडणी-वाहतूक खर्च ७७० रुपये आहे.

त्यांनी उसाचे प्रति टन सरासरी ३ हजार ६५० रुपये दिले आहेत. एवढ्या दराची मागणी सभासदांनी सभेत करावी. गेली २० वर्षे महाराष्ट्रात शेतकऱ्यांना प्रति वर्षी प्रति टन ४०० रुपये कमी दिले जात आहेत. गत हंगामातील उसाला ३६५० रुपये दर हवा, अन्यथा आंदोलन करण्यात येईल.’’