Chh. Sambhajinagar News : मराठवाड्यातील आठही जिल्ह्यांत यंदाच्या खरीप हंगामातील पिके विमा संरक्षित करण्याकडे शेतकऱ्यांनी काणाडोळाच केल्याची स्थिती आहे. गतवर्षीच्या तुलनेत छत्रपती संभाजीनगर कृषी विभागातील तीन जिल्ह्यांत केवळ १६.२५ टक्के, तर लातूर कृषी विभागातील पाच जिल्ह्यांत केवळ १८.५६ शेतकऱ्यांनी आपल्या पिकांना विमा संरक्षण देण्याला पसंती दिली आहे.

आधीच्या एक रुपयात पीकविमा योजनेनंतर पीक विमासाठी बदललेल्या निकषामुळे पिकांना वीमा संरक्षण देणे शेतकरी इष्ट समजत नसल्याचे चित्र आहे. पाऊस वेळेवर न पडणे अतिवृष्टीमुळे नुकसान होणे कीड व रोगामुळे नुकसान होणे काढणे पश्चात नैसर्गिक आपत्तीने होणाऱ्या नुकसानीसाठी विमा संरक्षण दिले जायचे. त्यामध्ये विमा संरक्षित रकमेच्या २५ टक्के रक्कम आगाऊ देण्याची तरतूद होती.

परंतु आता बदललेल्या पीकविमा धोरणामुळे या सर्व तरतुदींना कोलदांडा देत केवळ पीक कापणी प्रयोग आटोपल्यानंतर येणाऱ्या उत्पादकतेवरच विमा संरक्षित रक्कम दिली जाणार आहे. त्यामुळे शेतकऱ्यांचा कल पिकांना विमा उतरवण्याकडे कमी असल्याचे चित्र आहे.

छत्रपती संभाजीनगर कृषी विभागातील छत्रपती संभाजीनगर, जालना व बीड या तीन जिल्ह्यांतून सुमारे ७१ हजार ८३५ शेतकऱ्यांनी सहा लाख १४ हजार ३१३ अर्जाद्वारे सुमारे २ लाख ८८ हजार ८४८.२९ हेक्टर क्षेत्र विमा संरक्षित केले आहे. गतवर्षी या विभागात खरीप पीकविमा संरक्षित करण्यासाठी १३ लाख ८७ हजार ६२ शेतकऱ्यांनी ३७ लाख ८० हजार २२७ अर्जाद्वारे पुढाकार घेतला होता.

लातूर कृषी विभागात गतवर्षीच्या हंगामात १८ लाख ८८ हजार ३६४ शेतकऱ्यांनी ३९ लाख ७३ हजार ८११ अर्जाद्वारे पिकांना विमा संरक्षण घेतले होते. यंदा मात्र आतापर्यंत केवळ ५० हजार ९३८ शेतकऱ्यांनी ७ लाख ३७ हजार ५५७ अर्जांद्वारे सुमारे ४ लाख ८० हजार ९४२.०९ हेक्टर क्षेत्र विमा संरक्षित केले आहे.