Sindhudurg News : फळपीक विमा परताव्यासाठी वेंगुर्ले येथील आंबा, काजू बागायतदारांनी मंगळवारपासून (ता. ७) कृषी कार्यालयासमोर उपोषण सुरू केले होते. तालुका कृषी अधिकाऱ्यांनी आश्वासन दिल्यानंतर उपोषण तात्पुरते स्थगित करण्यात आले.

परंतु चार दिवसांत परतावा मिळाला नाही तर उग्र आंदोलन छेडण्याचा इशारा या वेळी बागायतदारांनी दिला.पुनर्रचित हवामान आधारित फळपीक विमा योजनेअंतर्गत देय रक्कम अद्याप आंबा, काजू बागायतदारांना मिळालेली नाही.

त्यामुळे जिल्ह्यातील सर्वच बागायतदारांमध्ये नाराजीचा सूर आहे. मंगळवारपासून वेंगुर्ला तालुक्यातील बागायतदारांनी कृषी कार्यालयासमोरच उपोषण सुरू केले होते.

चर्चेसाठी माजी आमदार राजन तेली आणि जिल्हा बँकेचे माजी संचालक एम. के. गावडे हे आले होते. त्यांनी भरपाईसाठी शासनस्तरावर पाठपुरावा केला जाईल, असे सांगितले.