Kolhapur News : दूध संघांनी गाईचे दूध खरेदी दर कमी केल्याच्या निषेधार्थ शुक्रवारी (ता.२०) शेतकरी संघटना व कोल्हापूर जिल्हा दूध उत्पादक संघटनेच्या संयुक्त विद्यमाने येथे आंदोलन करण्यात आले. दुधाचे कॅन रस्त्यावर ओतून या दर कपातीचा निषेध करण्यात आला.

गेली वर्षभर गायीच्या दूध दरात सातत्याने तोटा सहन करावा लागत आहे. त्यामुळे दूध उत्पादकांमध्ये तीव्र नाराजी आहे. प्रति लिटर १० ते १५ रुपयांचा तोटा सहन करून दूध उत्पादक शेतकरी दूध घालत आहेत.

दूध उत्पादनातील वाढता तोटा सहनशक्तीच्या पलीकडे गेला आहे. राज्य सरकारने ही परिस्थिती लक्षात घेऊन नागपूर अधिवेशनात जाहीर केल्याप्रमाणे दुधाला किमान प्रति लिटर ४० रुपये दर द्यावा.

बंद केलेले दूध अनुदान पुन्हा सुरू करावे. वाढता उत्पादन खर्च व तोटा पाहता अनुदानात वाढ करून ते प्रति लिटर १० रुपये करावे. यासह जिल्ह्यातील दूध संघांनी गायीच्या दूध खरेदी दरात केलेली कपात मागे घ्यावी यासाठी हे आंदोलन झाले.

शेतकरी संघटनेचे जिल्हा अध्यक्ष अॅड. माणिक शिंदे, कोल्हापूर जिल्हा दूध उत्पादक संघटना अध्यक्ष ज्योतिराम घोडके, सतीश चव्हाण, मच्छींद्र पाटील, शशिकांत यादव, अमर रजपूत, आदींसह शेतकरी या आंदोलनात सहभागी झाले. मागणीनुसार निर्णय न झाल्यास उपोषणास बसण्याचा इशारा या वेळी दूध उत्पादकांनी दिला.