Beed News : कोरडवाहू असलेल्या बीड जिल्ह्यात मोठ्या हिमतीने शेतकरी शेतीत नवनवीन प्रयोग करण्यासाठी धडपडतो. काही वेळा निसर्ग व बाजारातील शेतमालाच्या भावाची स्थिती साथ देते. मात्र अनेकदा शेतकऱ्यांच्या नशिबी अपयश पडत आहे.

जिल्ह्यातील मोसंबी उत्पादक शेतकऱ्यांपुढे यंदाही असेच संकट उभा ठाकले आहे. गेल्या काही वर्षांपासून एखादा अपवाद वगळला तर १५ ते २० रुपयांपुढे भाव मिळत नाही. त्यामुळे आता शेतकऱ्यांवर या बागांवर कुऱ्हाड चालविण्याची वेळ येऊन ठेपली आहे.

बीड जिल्ह्यात पारंपरिक पिकांसोबत चांगला आर्थिक मोबदला देतील, अशा पिकांच्या शोधात शेतकरी असतात. गेल्या काही वर्षांत कापस, सोयाबीनचे भाव कोलमडलेले आहेत. अशा स्थितीत शेतकऱ्यांनी पाण्याचे नियोजन करत फळबागा घेण्यास सुरवात केली. मात्र, या फळबागांसाठी मोठी मेहनत घेऊनही पदरी अपयश पडत आहे.

सध्यस्थितीत मोसंबीला चांगला बाजारभाव मिळत नसल्यामुळे अनेक शेतकरी बागा तोडून टाकत आहेत. मोसंबीला अपेक्षित बाजारभाव मिळत नसल्याने उत्पादन खर्चही निघत नाही. या फळपिकावर खत, पाणी, मजुरी यासाठी मोठा खर्च होतो. भाव कमी असल्यास तो खर्च भरून निघत नाही. याशिवाय बहुतांशी शेतकऱ्यांना सरळ ग्राहकांपर्यंत पोहोचण्याचा पर्याय नाही, ती नसल्यामुळे शेतकरी मोसंबी बागा तोडण्याच्या शेवटच्या पर्यायावर येऊन ठेपले आहेत.

जेसीबीने तोडली ७५० झाडे

धुनकवाड येथील प्रगतशील शेतकरी कल्याण कुलकर्णी यांनी आठ वर्षांपूर्वी मोसंबीची बाग फुलविली. गेल्या काही वर्षांपासून मोसंंबीचा भाव हा १५ ते २० रुपयांदरम्यानच अडकून आहे. त्यामुळे उत्पादनासाठी केलेला खर्चही निघेनासे झाले. अखेर कुलकर्णी यांनी दोन दिवसांपूर्वी ही ७५० झाडे जेसीबी लावून तोडून टाकली. या नुकसानीमुळे शेतकरी कुलकर्णी हे व्यथित झाले.