Panchaganga River Pollution Kolhapur : पंचगंगा नदीची गटार गंगा झाल्यानंतर प्रदूषण नियंत्रण मंडळाला पाहणी करण्याची जाग आल्यानंतर प्रदूषण नियंत्रण मंडळाचे क्षेत्र अधिकारी सचिन हरबट यांना पंचगंगा प्रदूषण विरोधी आंदोलकांनी प्रश्नांची सरबत्ती करीत धारेवर धरले. पंचगंगेच्या प्रदूषित पाण्याने कॅन्सरसारख्या आजाराशी जिल्ह्यातील शिरोळ तालुक्याला सामना करावा लागत आहे. शेती नापीक होत आहे. आरोग्याच्या समस्या भेडसावत आहेत.

नदी प्रदूषित करणाऱ्या घटकांवर प्रशासन कारवाई करणार आहे का नाही, असा सवाल मराठा सेवा संघाचे जिल्हाध्यक्ष महिपती बाबर यांच्यासह मासेमारी करणाऱ्या भुई बागडी समाजबांधव व शेतकऱ्यांनी केला. प्रदूषित घटकांवर कारवाई केल्याशिवाय सोडणार नाही, असा पवित्रा घेत घेराओ घातला.

दरम्यान, इचलकरंजी महापालिकेचा फिल्टर हाउसचे चेंबर फुटल्याने १८ एम. एल. डी. प्रदूषित पाणी पंचगंगा नदीत मिसळले आहे. त्यांना कारवाईची नोटीस देणार असल्याचे प्रादेशिक अधिकारी जगन्नाथ साळुंखे यांनी फोनवरून आश्वासन दिल्याने आंदोलनकर्ते शांत झाले आणि हरबट यांना घेराओमुक्त करण्यात आले.

तेरवाड (ता. शिरोळ) बंधारा येथे पंचगंगा नदीला प्रदूषित  पाणी  आल्याने पात्र फेसाळले आहे. पाण्याला दुर्गंधी सुटली आहे. त्याबाबत आज सायंकाळी पाचच्या सुमारास पाण्याचे नमुने घेण्यासाठी क्षेत्रीय अधिकारी हरबट आले असता बाबर यांनी त्यांना पाण्यामुळे होत असलेले दुष्परिणाम सांगत संताप व्यक्त केला.

प्रोसेस व काही शहरातील सांडपाणी  प्रक्रियेविना नदीत सोडले जात आहे. पाणलोट क्षेत्रात झालेल्या पावसाचे पाणी  वाहत आल्याने नदीत मिसळलेले सांडपाणी  थेट वाहत तेरवाड बंधाऱ्यापर्यंत आले आहे. अनेक गावच्या पाणी योजना, शेती पंप या नदीवर आधारित आहेत, तर समाज बांधवांचीही मासेमारी यावरच अवलंबून आहे.

रासायनिक पाण्याने मासे, तर मृत्युमुखी पडतच आहेत. त्यामुळे प्रशासनाने शेतकऱ्यांचा अंत न पाहता याबाबत तत्काळ उपाययोजना राबवावी, अन्यथा तीव्र आंदोलन छेडण्याचा इशारा दिला. यावेळी क्षेत्रीय अधिकारी हरबट यांनी पाण्याचे नमुने घेतले. याबाबत आपल्या भावना वरिष्ठ अधिकाऱ्यांसमोर मांडून योग्य ती उपाययोजना राबवू, असे त्यांनी सांगितले. यावेळी मुकुंद सावगावे, रोहित माने, इरफान बेपारी, सचिन भोसले, प्रभाकर बंडगर आदी ग्रामस्थ उपस्थित होते.