Pune News: राज्य लोकसेवा आयोगातर्फे घेण्यात येणाऱ्या दिवाणी न्यायाधीश परीक्षेचा निकाल नुकताच जाहीर झाला. यामध्ये ग्रामीण भागातील हवेली तालुक्यातील तुळापूर येथील एका शेतकरी कन्येने जिद्द, चिकाटी आणि परिश्रमाच्या जोरावर वयाच्या अवघ्या २५ व्या वर्षी घवघवीत यश संपादन केले आहे. प्रतीक्षा पांडुरंग बोत्रे असे तिचे नाव आहे.

प्रतीक्षाने तुळापूर येथे प्राथमिक आणि माध्यमिक शिक्षण पूर्ण केले. अकरावी व बारावीचे शिक्षण वाघोलीतील भारतीय जैन संघटनेच्या महाविद्यालयात घेतले. त्यानंतर पुणे येथून कायद्याची बीए एलएलबी ही पदवी घेतली.

२०२२ मध्ये न्यायाधीश पदासाठी आलेल्या एमपीएससीच्या जाहिरातीवरून स्पर्धा परीक्षेचा अभ्यास सुरू केला. विशेषतः पहिल्याच प्रयत्नात न्यायिक दंडाधिकारी प्रथम वर्ग न्यायाधीश परीक्षा उत्तीर्ण केली.प्रतीक्षाला २५० गुणांच्या परीक्षेत एकूण १५० गुण मिळाले, तर मुलाखतीमध्ये ३४ गुण मिळाले आहेत.

राज्यभरातून जवळपास १५ हजार विद्यार्थी या परीक्षेसाठी बसलेले होते. मात्र अंतिम यादीत फक्त ११४ विद्यार्थी ही परीक्षा उत्तीर्ण झाले आहेत. प्रतीक्षाचे आई- वडील शेती व जोडव्यवसाय करतात. या यशानंतर परिवारासह प्रतीक्षाला आनंदाश्रू अनावर झाल्याचे पाहायला मिळाले.

‘‘आई -वडिलांनी दिलेल्या प्रेरणेमुळेच मला हे यश प्राप्त झाले. ग्रामीण भागात शक्य तेवढ्या सुविधा नसतात. ज्यांची परिस्थिती चांगली असेल आणि ज्या विद्यार्थ्यांना शक्य असेल तर त्यांनी बाहेर पडल्याशिवाय पर्याय नाही. पुण्यात चांगले क्लासेस आहे. तेथे जाऊन चांगला अभ्यास, कष्ट केल्यास कोणतीही गोष्ट अशक्य नाही.

त्यासाठी कुटुंबातून मोकळीक दिली पाहिजे. आज सर्व क्षेत्रात स्पर्धा खूप आहे. परंतु स्मार्ट वर्क केल्यास वेळेत यश नक्कीच मिळते,’’ अशी प्रतिक्रिया प्रतीक्षाने ‘अॅग्रोवन’शी बोलताना व्यक्त केली.