Latest Agriculture News : खरिपातील हळवे भात पीक तयार झाले असून, भातकापणीच्या तयारीला शेतकरी वर्ग लागला आहे. ग्रामीण भागात अजूनही शेतकरी विळ्यांच्या साह्याने भात कापणी करतात. यामुळे लोहार काम करणाऱ्या कारागिरांना चांगले दिवस आले आहेत.

ग्रामीण भागातील अनेक शेतकरी जुने विळे - कोयते लोहार काम करणाऱ्यांच्या दुकानात आणून देत असून त्याला पुन्हा धार लावून घेत आहेत. या कामासाठी अनेक गाव खेड्यातून शेतकरी वर्ग लोहाराच्यादुकानात सकाळपासून गर्दी करीत आहेत.

सध्या नवीन विळा घ्यायचा झाल्यास १२० ते १३० रुपये लागतात, तर फक्त जुन्या विळ्याला पुन्हा धार लावून घ्यायची असल्यास ७० ते ८० रुपये द्यावे लागतात. यंदा पाच ते दहा रुपयांनी भाव वाढल्याचे शेतकरी म्हणत आहेत.

सध्या पारंपारिक लोहार काम करणारे कमी झाल्याने ठराविक ठिकाणीच ही कामे केली जातात. कासाच्या रोटी, घंजाळ. वरोती परिसरात असलेल्या लोहारांच्या दुकानात गर्दी होत आहे.

हार्डवेअरच्या दुकानातही अनेक विळे विकायला ठेवले असून त्याला मागणी कमी आहे. ते स्वस्त असून नाजूक असल्याने त्याने नीट कापणीचे काम होत नसल्याचे अनेक मजुरांचे म्हणणे आहे.

त्यामुळे अजूनही पारंपारिक लोखंडी विळ्यांचा वापर शेतकरी वर्ग करीत आहे.सध्या पावसाने विश्रांती घेतल्याने भात कापणीसाठी शेतकरी झाला आहे. तसेच कापणीसाठी लागणारी अवजारे तयार करण्याच्या कामांना वेग आला आहे.