Jalna News : कापसाला मागील दोन वर्षांपासून भावच नाही. त्यातच यंदा दोन ते तीन वेचणीतच कपाशीचा खराटा झाला आहे. त्यामुळे शेतकऱ्यांना आर्थिक फटका बसला आहे. तालुक्यातील शेतकऱ्यांनी उत्पन्नाची आशा जागवित कपाशीची लागवड केली होती. त्यामध्ये परतीच्या पावसाने मोठे नुकसान झाले.

त्यानंतर दोन ते तीन वेचणीतच कपाशीचा खराटा झाला आहे. दरम्यान, अगोदरच दुष्काळात होरपळलेल्या शेतकऱ्यांच्या नशिबी पुन्हा एकापाठोपाठ एक संकट ओढवले आहे. कधी नैसर्गिक आपत्ती, रोगराई, बेमोसमी पाऊस यामुळे शेतकरी पुरता हतबल झाला आहे.

शेतकऱ्यांच्या पाठीशी लागलेल्या संकटामुळे शेतकऱ्यांना कापूस वेचणीसाठी वेळेत मजूर न मिळाल्याने अनेकांच्या कापसाची वेचणी न केल्याने नासाडी झाली आहे. वेचणी केल्यानंतर एक ते दोन वेचणीतच कपाशीचा खराटा झाला आहे.

कापूस वेचणीसाठी गावात महिला शेतमजूर मिळत नसल्याने शहरातून व इतर ठिकाणाहून वाहनातून मजूर कापूस वेचणीसाठी आणण्याची वेळ आली आहे.

वाहन भाडे, कापूस वेचणीची मजुरी यात मोठ्या प्रमाणात खर्च होत आहे. कापसाच्या भाववाढीची दीर्घ प्रतीक्षा आहे. मात्र, योग्य भाव मिळत नसल्याने शेतकऱ्यांची पुरती भ्रमनिराशा होत चालली आहे.