Cotton Picking Rate : कापसाचे अपेक्षित उत्पादन होण्याची आशा कमी; वेचणीचे दरही वाढले

Chhatrapati Sambhajinagar : मराठवाड्यातील छत्रपती संभाजीनगर, जालना व बीड या तिन्ही कापूस उत्पादक जिल्ह्यांत कापसाचे उत्पादन अपेक्षित होण्याची आशा यंदा कमी आहे. शिवाय मजुरांचा प्रश्न गंभीर बनल्याने वेचणीचे दरही वाढले आहेत. त्यामुळे कापूस उत्पादकांच्या पदरात यंदा काय पडेल हा प्रश्न आहे.

कृषी विभागाच्या माहितीनुसार, छत्रपती संभाजीनगर जिल्ह्यात कपाशीचे सर्वसाधारण क्षेत्र ३ लाख ९४ हजार ७७१ पासून प्रत्यक्षात ३ लाख ६२ हजार ४२० हेक्टर अर्थात सर्वसाधारण क्षेत्राच्या तुलनेत ९१ टक्के क्षेत्रावर कापसाची लागवड झाली. जिल्ह्यात काही ठिकाणी कापसाची वेचणी सुरू झाली आहे. ऑक्टोबरमध्ये आलेल्या पावसाने वेचणी झालेल्या कापसाचे मोठे नुकसान झाले.

जालना जिल्ह्यात कपाशीचे सर्वसाधारण क्षेत्र तीन लाख नऊ हजार ५९ हेक्टर असून प्रत्यक्षात दोन लाख ९१ हजार ६७६ हेक्टरवर कपाशीची लागवड झाली. लागवड सर्वसाधारण क्षेत्राच्या तुलनेत ९४ टक्के आहे. छत्रपती संभाजीनगर जिल्ह्यातही ऑक्टोबरमध्ये आलेल्या पावसाने फुटलेला कापूस भिजवण्याचे काम केले. बीड जिल्ह्यात कपाशीचे सर्वसाधारण क्षेत्र तीन लाख ५५ हजार ४९३ हेक्टर असून प्रत्यक्षात दोन लाख ६३ हजार ९०७ हेक्टरवरच कपाशीची लागवड झाली.

ती लागवड सर्वसाधारण क्षेत्राच्या तुलनेत केवळ ७४ टक्केच आहे. एकीकडे क्षेत्र घटले असतानाच कापसाची उत्पादनही जवळपास ४० ते ५० टक्क्यांपर्यंत घटण्याचा शेतकऱ्यांचा अंदाज आहे. सुरुवातीला मजुरीचे दर प्रति किलो वेचणीला दहा रुपये इतके होते. आता त्या दरात वाढ होऊन १२ ते १३ रुपये पर्यंत प्रति किलो कापूस वेचणीला द्यावे लागत आहेत. दुसरीकडे मजुरांचा प्रश्न मोठा आहे.

कापूस वेचणीला जड जात असल्याने मजुरीचे दर वाढले आहेत, असे काही शेतकऱ्यांनी सांगितले. आताच्या घडीला बाजारात विक्रीसाठी येणारा बहुतांश कापूस आधारभूत किमतीने खरेदीच्या निकषात बसत नसल्याने खासगी बाजारात त्याचे दरही दबावात आहेत. साधारणतः ६ हजार ५०० ते ६ हजार ७०० रुपये प्रतिक्विंटलपर्यंत विक्रीला येणाऱ्या कापसाला दर मिळत, असल्याची माहिती शेतकरी व बाजाराच्या सूत्रांनी दिली.