Pune News : मुख्यमंत्री शाश्‍वत कृषी सिंचन योजनेतून नव्या शेततळ्यांची खोदाई केलेल्या अंदाजे पाच हजार शेततळ्यांना ३३ कोटी रुपयांपेक्षा जास्त अनुदान आतापर्यंत वाटण्यात आले आहे. मात्र बॅंक खाते आधार संलग्न नसल्यास अनुदान न देण्याची ठाम भूमिका कृषी विभागाने घेतली आहे.

शेततळ्यासाठी अनुदान मिळवण्याकरिता शेतकऱ्याकडून ऑफलाइन अर्ज मागवण्याची क्लिष्ट पद्धत कृषी विभागाने यापूर्वीच बंद केली आहे. मात्र ऑनलाइन अर्ज मागवून सोडत काढणे व केवळ सोडतीत पात्र ठरलेले अर्ज विचारात घेण्याचे आधीचे धोरणही रद्द करण्यात आले आहे.

‘महाडीबीटी’च्या https://mahadbt.maharashtra.gov.in/Farmer/Login/Login या संकेतस्थळावर अर्ज करताच अनुदानाचा लाभ, या नव्या धोरणानुसार आता ऑनलाइन अर्ज मागवून तत्काळ मंजुरी दिली जात आहे. मृद्‍संधारण संचालक रवींद्र भोसले यांच्याकडून शेततळे बांधणी योजनेचा सातत्याने आढावा घेतला जात आहे.

सूत्रांच्या म्हणण्यानुसार, शेततळे अनुदान योजनेच्या प्रक्रियेत यंदा राज्यभरातील ७६७१९ शेतकऱ्यांचे अर्ज विचारात घेण्यात आले आहेत. अनुदानासाठी निवड केलेल्या एकूण शेतकऱ्यांपैकी आतापर्यंत २८१४१ शेतकऱ्यांनी राज्य शासनाच्या संकेतस्थळावर आवश्यक कागदपत्रे अपलोड केलेली आहेत.

त्यातील १७२१९ शेतकऱ्यांना तळे खोदाईसाठी पूर्वसंमती देण्यात आली आहे. तळे खोदाई पूर्ण झाल्यामुळे अनुदान मिळावे यासाठी राज्यभरातून ५२८५ गावांमधून अनुदान मागणी प्रस्ताव कृषी विभागाला आले आहेत. अर्थात, जागेवर तळ्याची तपासणी केल्यानंतरच अनुदान देण्याची भूमिका कृषी विभागाने घेतली आहे.

‘‘अनुदान मागणी करणाऱ्या प्रस्तावांपैकी ५२८५ प्रस्तावांना अनुदान देण्याबाबत कृषी विभाग सकारात्मक आहे. मात्र त्यासाठी तळ्याच्या बांधकामाची प्रत्यक्ष तपासणी केली जाते. तपासणीअंती ४९७० तळ्यांना अनुदान देण्यात आले आहे. परंतु आधार संलग्नता नसलेल्या ७० प्रकरणांना तूर्त अनुदान मिळणार नाही. सर्व अटींची पूर्तता केलेल्या २४५ शेततळ्यांना आम्ही याच महिन्यात अनुदान वाटणार आहोत, असे कृषी विभागातून सांगण्यात आले.