Akola News : खरीप हंगामासाठी १२७५ कोटींची यंदा तरतूद करण्यात आली. मात्र, पीककर्ज नूतनीकरणापासून अनेक शेतकरी दूर असल्याने वाटपाचा लक्ष्यांक पूर्ण होऊ शकलेला नाही. अद्यापही साडेचारशे कोटी रुपयांची रक्कम शिल्लक असल्याची बाब समोर आली आहे.

या भागात प्रत्येक जिल्ह्यात पीककर्ज नूतनीकरण न केलेल्या शेतकऱ्यांची संख्या मोठी असल्याने यंदा नियोजित निधी वाटप होण्याची शक्यता कमी झाली आहे.

खरीप हंगामासाठी या वर्षात शेतकऱ्यांनी शुक्रवारी (ता.३०) पूर्वी पीककर्जाचे नूतनीकरण करणे आवश्यक होते. त्याशिवाय नवीन पीककर्जासाठी हे शेतकरी पात्र ठरणार नाहीत. जिल्हाधिकारी निमा अरोरा यांनी ३० जूनपूर्वी नूतनीकरण करण्याचे आवाहन केले आहे.

विविध बॅंकांकडून खरीप हंगामासाठी शेतकऱ्यांना पीककर्ज वाटप केले जात आहे. सन २०२३-२४ या वर्षात अकोला जिल्ह्यातील एक लाख ४७ हजार ९५० शेतकऱ्यांना १२७५ कोटी रुपये खरीप पीककर्ज वाटपाचे उद्दिष्ट दिलेले आहे. जिल्ह्यात २६ जूनपर्यंत ७६ हजार ४८२ शेतकऱ्यांना ८०२ कोटी ४० लाखांचे खरीप पीककर्ज वाटप झालेले आहे.

जिल्ह्यातील नव्याने पीककर्ज घेण्यास पात्र असलेल्या शेतकऱ्यांनी कर्ज मागणी अर्ज बॅंकांकडे दाखल करावेत आणि नूतनीकरणापासून दूर असलेल्या शेतकऱ्यांनी ३० जूनपूर्वी पीककर्जाचे नूतनीकरण करावे, असे आवाहन प्रशासनाने केले आहे.

‘पीककर्जाचे नूतनीकरण गरेजेचे’

खरीप पीककर्ज वाटपाचे निर्धारित उद्दिष्ट साध्य करण्यासाठी पात्र शेतकऱ्यांना पीककर्ज वाटप होणे गरजेचे आहे. यासाठी गेल्या हंगामातील पीककर्ज भरून नूतनीकरण करणे आवश्यक आहे. सर्व बॅंका पीककर्ज वाटपासाठी गावोगावी शिबिरे घेत आहेत. शेतकऱ्यांच्या घरी जाऊनही पीक कर्जाच्या नूतनीकरण करण्याबाबत आवाहन करीत आहे.

भारतीय रिझर्व्ह बॅंकेच्या मार्गदर्शक तत्त्वानुसार अल्प मुदतीच्या पीक कर्जाची परतफेड ३६५ दिवसांच्या आत किंवा दरवर्षी ३० जून रोजी किंवा त्यापूर्वी केलेले असावे.

पीककर्ज वाटप

लक्ष्यांक- १२७५ कोटी

प्रत्यक्ष वाटप - ८०२ कोटी ४० लाख

शिल्लक रक्कम- ४७३ कोटी