Jalna News : परभणी, जालना जिल्ह्यातील शहरासह शेकडो गावांची तहान भागविणाऱ्या निम्न दुधना प्रकल्पात वेगाने पाणी साठा होत आहे. मागील दहा दिवसांत प्रकल्पांत १४ टक्के जलसाठ्यात वाढ झाली असून, सध्या प्रकल्पात ४८.८४ टक्के पाणीसाठा झाला आहे.

तीन वर्षांपूर्वी सप्टेंबर आणि ऑक्टोबर महिन्यांत अतिवृष्टी झाल्यामुळे निम्न दुधना प्रकल्पात मोठ्या प्रमाणावर पाण्याची आवक झाली होती. परंतु, प्रकल्पाच्या बुडीत क्षेत्रात गेलेल्या असंपादित जमिनीवर शंभर टक्के जलसाठा झाल्यानंतर पिकांचे नुकसान होत असल्यामुळे प्रकल्पात केवळ ७५ टक्के जलसाठा ठेवून उर्वरित पाणी दुधना नदीपात्रात सोडण्यात आले होते.

त्यानंतर प्रकल्पातील शिल्लक जलसाठ्यातून रब्बी हंगामातील पिकांना प्रकल्पाच्या दोन्ही कालव्यांतून चार पाणी आवर्तने सोडण्यात आली होती. तसेच उन्हाळी पिकांनाही कालव्यातून पाणी देण्यात आले होते. त्यामुळे प्रकल्पाची पाणी पातळी खालावली होती. या प्रकल्पावर सेलूसह जालना जिल्ह्यातील परतूर, मंठा व वॉटर ग्रीड योजनेतील शेकडो गावांच्या पिण्याच्या पाण्याची भिस्त आहे

पाणीसाठा १०० टक्के की ७५ टक्के तिढा कायम...

मागील तीन वर्षांपासून शेतकऱ्यांच्या असंपादित जमिनीत प्रकल्पाचे पाणी जात असल्याने शेतकऱ्यांच्या पिकाचे नुकसान होत आहे. त्यामुळे या शेतकऱ्यांनी पाणी साचत असलेल्या आपल्या जमिनी शासनाने संपादित करून मोबदला देण्याची मागणी केली.

मात्र या मागणीकडे शासनाने दुर्लक्ष करीत धरणाची पाणी साठवण क्षमता १०० टक्क्यांवरून ७५ टक्क्यांवर आणली. यामुळे उन्हाळ्यात पाणीटंचाईचा सामना करावा लागत आहे.

यावर अनेक संघटनानी जमीन संपादित करून मोबदला देऊन धरण १०० टक्के भरणे जेणेकरून पाणीटंचाई निर्माण होणार नाही अशी मागणी केली आहे. त्यामुळे अजूनही पाणीसाठा १०० टक्के की ७५ टक्के तिढा कायम असल्याची स्थिती आहे.

दुधनाच्या पाणलोट क्षेत्रात मागील काही दिवसांपासून पाऊस पडत असल्याने प्रकल्पात पाण्याची आवक सुरू आहे. काही भागात ढगफुटी सदृश पाऊस झाला. यामुळे शेतकऱ्यांना पिकाचे मोठे नुकसान झाले आहे.तर काही गावचा संपर्क तुटला असल्याचे तालुका अध्यक्ष काँग्रेस कमिटी अध्यक्ष बालासाहेब आकात म्हणाले.