Dam Water Levels: पुणे जिल्ह्यातील धरणांत ७५ टक्क्यांवर पाणीसाठा

Pune News: पुणे जिल्ह्यातील धरणक्षेत्रात मॉन्सूनपूर्व पावसाचा जोर कमीअधिक आहे. मे अखेरीस झालेल्या पावसाने ओढे, नाले ओसंडून वाहू लागले होते. यंदा जिल्ह्यातील २६ धरण साखळीत १५०.४१ टीएमसी म्हणजेच ७५.८३ टक्के पाणीसाठा झाला आहे. तर तीन धरणे शंभर टक्के भरली असून, सोळा धरणांतून पाण्याचा विसर्ग सुरू आहे.

यंदा जिल्ह्यातील २६ धरणांत नव्याने मोठ्या प्रमाणात पाण्याची आवक झाली आहे. ३१ मेपर्यंत धरणांत उपयुक्त जवळपास २० टीएमसी एवढ्या पाण्याचा येवा दाखल झाला होता. गेल्या आठवड्यापूर्वी पावसाने उघडीप दिली होती. या काळात अनेक ठिकाणी कडक ऊन पडत होते. त्यामुळे धरणातील आवक घटली होती.

त्यानंतर पुन्हा मागील काही दिवसांपासून घाटमाथा व धरणक्षेत्रात अधूनमधून सरी बरसत आहेत. आतापर्यंत उजनी, मुळशी, टेमघर अशा काही महत्त्वाच्या धरणक्षेत्रात जोरदार पाऊस पडल्याची नोंद जलसंपदा विभागाकडे झाली आहे. त्यामुळे नीरा, मुठा खोऱ्यातील धरणातील पाणीसाठ्यात काही प्रमाणात वाढ झाली आहे.

आता पावसाचे प्रमाण कमी झाले असले तरी शुक्रवारी (ता. ११) सकाळी आठ वाजेपर्यंत ५.०५ टीएमसी एवढ्या पाण्याची आवक झाली आहे. एक जूनपासून ते आतापर्यंत धरणात नव्याने १८२.६१ टीएमसी एवढ्या मोठ्या प्रमाणात पाण्याचा येवा दाखल झाल्याने पिण्याच्या पाण्याची काही प्रमाणात समस्या सुटली आहे. सध्या धरणांत एकूण उपयुक्त पाणीसाठा मोठ्या प्रमाणात झाला आहे. तर अनेक धरणांत ७५ टक्क्यांहून अधिक पाणीसाठा झाला असल्याने पाण्याचा विसर्ग सोडण्यात आला आहे.

धरणनिहाय उपयुक्त पाण्याचा साठा, टीएमसीमध्ये : टेमघर २.३४, वरसगाव ९.५७, पानशेत ७.४२, खडकवासला १.१०, पवना ६.५१, कासारसाई ०.४९, कळमोडी १.५१, चासकमान ६.०८, भामा आसखेड ४.७८, आंध्रा २.८७, वडिवळे ०.८५, शेटफळ ०.२६, नाझरे ०.५९, गुंजवणी २.४२, भाटघर १८.१६, नीरा देवघर ६.७६, वीर ८.०१, पिंपळगाव जोगे ०.९५, माणिकडोह २.५१, येडगाव १.७०, वडज ०.७६, डिंभे ८.६३, चिल्हेवाडी ०.६३, घोड ४.०८, विसापूर ०.९०, उजनी ५०.५३.