Thane News : गेल्या चार दिवसांपासून पावसाने दडी मारल्याने पीक संकटात आले आहे. भातरोपांची वाढ होण्याची प्रक्रिया सुरू असतानाच पावसाचे पाणी नसल्याने शेतकरी हवालदिल झाले आहेत.

वातावरणातील बदलामुळे काही ठिकाणी पिकांवर खोडकिडा किंवा तुडतुड्या यांसारख्या रोगांचा प्रादुर्भाव वाढण्याची शक्यता वर्तवली जात आहे. तसेच ग्रामीण भागात उष्माही प्रचंड वाढल्याने साथीचे आजार बळावले आहेत.

ग्रामीण भागातील शहापूर, मुरबाड तालुक्यात ऑगस्टच्या पहिल्या आठवड्यात पावसाने माघार घेतल्याने उन्हाच्या झळा लागत आहे. हवामानातील उष्माही अचानक वाढला आहे.

लावणीनंतर बाळसे धरलेली भातपिके करपून त्यावर खोडकिडा किंवा तुडतुड्या यांसारख्या रोगांचा प्रादुर्भाव होण्याची भीती व्यक्त केली जात आहे. पिवळा खोडकिडा व पाने गुंडाळणाऱ्या अळी यांच्यासाठी हे वातावरण अत्यंत अनुकूल आहे.

लावणी केलेल्या भातरोपांची वाढ होण्याची प्रक्रिया सुरू असतानाच पावसाने दडी मारल्याने भाताचे पीक संकटात आले आहे. रोगांचा प्रादुर्भाव होऊ नये, म्हणून कीटकनाशक फवारणी करावी, असे आवाहन कृषी विभागाने केले आहे.