Paddy Bonus : सात हजारांवर शेतकऱ्यांना धानाच्या बोनसची प्रतीक्षा

Chandrapur News : धान उत्पादक शेतकऱ्यांना प्रतिहेक्टरी २० हजार रुपये बोनस देण्याचा निर्णय २५ मार्च रोजी घेण्यात आला. मात्र मूल तालुक्यातील २८० शेतकऱ्यांच्या खात्यातच बोनसची रक्कम जमा करत उर्वरित सात हजार शेतकऱ्यांना चार महिन्यांपासून प्रतीक्षेत ठेवण्यात आले आहे. परिणामी धान उत्पादकांमध्ये असंतोष व्यक्त होत आहे.

मे, जून महिन्यापासून खरीप हंगामाला सुरुवात झाली. याच हंगामात शेतकऱ्यांना पैशांची गरज असते. हाच उद्देश डोळ्यांसमोर ठेवून शासनाने शेतकऱ्यांना बोनस देण्याचा निर्णय निर्गमित केला. या निर्णयामुळे शेतकरी सुखावला.

मात्र, बोनस देण्याबाबत शासनाकडून कोणत्याही प्रकारच्या हालचाली दिसून येत नाही. आता तर शेतकऱ्यांचे रोवणे सुरू झाले आहेत. मजुरांना रोज पैसे द्यावे लागतात. नेमक्या याच वेळेला शेतकऱ्यांच्या हाती पैसे नाही. अशा प्रसंगी राज्यशासनाने जाहीर केलेल्या बोनसची रक्कम खात्यावर जमा करावी, अशी मागणी शेतकऱ्यांनी केली आहे.

सूत्रांनी दिलेल्या माहितीनुसार, बोनसचा लाभ मिळण्यासाठी शेतकऱ्यांना हमीभाव केंद्रावर नोंदणी करावी लागत होती. त्याकरिता ऑनलाइन प्रक्रिया अनेक शेतकऱ्यांनी पार पाडली. मूल तालुक्यात कृषी उत्पन्न बाजार समितीत ८२०० शेतकऱ्यांनी नोंदणी केली. शासनानेही नोंदणी केलेल्या शेतकऱ्यांना सरसकट हेक्टरी २० हजार रुपये बोनस देणार अशी घोषणा केली.

तसा निर्णय २५ मार्च रोजी निर्गमित केला. आज ना उद्या बोनसची रक्कम खात्यावर जमा होईल अशी आशा होती. मात्र, आजवर केवळ २८० शेतकऱ्यांच्या खात्यावर रक्कम जमा झाली आहे. अजूनही ७९२० शेतकरी बोनसच्या रकमेपासून वंचित आहेत.

घोषणेचा काय उपयोग

धान उत्पादक शेतकऱ्यांना राज्य शासनाने बोनस जाहीर केला. तसा अध्यादेश काढला. मात्र, चार महिने लोटून गेल्यावरही शेतकऱ्यांच्या खात्यावर बोनसची रक्कम जमा झाली नाही. त्यामुळे या घोषणेचा काय उपयोग असा प्रश्न शेतकऱ्यांनी उपस्थित केला आहे.

आता धान पेरणी, रोवणी सुरू आहे. शेतकऱ्यांच्या हाती पैसे नाही. बोनसची रक्कम मिळणार अशी आशा होती. मात्र, ती हंगामातही जमा झाली नाही. त्यामुळे शेतकऱ्यांत संताप व्यक्त केला जात आहे.