Sangli News : जिल्ह्यात जत, आटपाडी, तासगाव आणि कवठेमहांकाळ हे तीन तालुके वगळता इतर तालुके दुष्काळी म्हणून जाहीर करण्यात आले होते. राज्य शासनाने उर्वरित सहा तालुक्यांतील ३७ मंडलांमध्ये दुष्काळ जाहीर केला आहे.

त्यामुळे मध्यम दुष्काळी भागात ६५ मंडलाचा समावेश झाला आहे. नेहमी दुष्काळी असणारे तालुके दुष्काळ म्हणून जाहीर करण्यात आल्याने शेतकऱ्यांना दिलासा मिळाला असल्याचे चित्र आहे.

सांगली जिल्ह्यात एकूण ६८ मंडल आहेत. आधी कडेगाव, मिरज, शिराळा, खानापूर-विटा या चार तालुक्यांमध्ये मध्यम दुष्काळ जाहीर केला होता. जत आटपाडी, कवठेमहांकाळ आणि तासगाव या तालुक्यांना दुष्काळातून वगळण्यात आले होते. त्यामुळे तीव्र नाराजी व्यक्त केली होती. सर्वपक्षीय नेत्यांनी आंदोलने केली होती.

वाळवा आणि पलूस हे दोन तालुके नदीकाठावर असल्याने तेथे पाऊस कमी झाला असला तरी टंचाईची दाहकता असत नाही. त्यामुळे त्या तालुक्यातून दुष्काळाबाबत फारशी आग्रही मागणी दिसत नव्हती. परंतु दुष्काळ जाहीर करावा अशी मागणी शेतकऱ्यांच्यातून व्यक्त होत आहे.

परंतु आता राज्य शासनाने मंत्रिमंडळ उपसमितीची बैठक घेण्यात आली. त्यामध्ये कमी पर्जन्यमान झालेल्या महसुली मंडळामध्ये दुष्काळसदृश परिस्थिती घोषित करून तेथे सवलती लागू करण्याचा निर्णय घेण्यात आला आहे.

त्यामुळे राज्य शासनाने नव्याने जाहीर केलेल्या यादीत सांगली जिल्ह्यातील आणखी ३७ मंडलांचा समावेश केला आहे. त्यामुळे जिल्ह्यातील एकूण ६५ मंडल आता मध्यम दुष्काळी ठरणार आहेत. आधी जाहीर केलेल्या मध्यम दुष्काळी तालुक्यांमध्ये टंचाईच्या सवलती जाहीर करण्यात आले आहेत.

नव्याने दुष्काळसदृश समाविष्ट मंडले

तालुका मंडल नावे संख्या

कवठेमहांकाळ ढालगाव, देशिंग, कुची, कवठेमहांकाळ, हिंगणगाव ५

वाळवा वाळवा, कोरेगाव, कुरळूप, तांदुळवाडी, ताकारी, पेठ, कासेगाव, बहे, आष्टा, इस्लामपूर, कामेरी ११

जत संख, माडग्याळ, जत, मुचंडी, डफळापूर, कुंभारी, उमदी, शेगाव ८

तासगाव मांजर्डे, विसापूर, येळवी, मणेराजुरी, सावळज, तासगाव ६

पलूस कुंडल, पलूस, भिलवडी, अंकलखोप ४

आटपाडी दिघंची, खरसुंडी, आटपाडी ३